* نەوژین
هاوشانی پێنج ژنە داهێنەری دیکە، خەڵاتی لۆریاڵی نێودەوڵەتی تایبەت بە ژنانی داهێنەر بە خانمە مامۆستایەکی زانکۆی چەرمۆ بەخشرا.
د. هێژا عومەر، پرۆفیسۆری یاریدەدەر و پسپۆڕی كیمیای دەرمانسازی لە زانکۆی چەرمو، وەک تاکە ژن لەسەر ئاستی عێراق و هەرێم یەکێک بو لەو ژنانەی خەڵاتی لۆریاڵی بۆ ئەمساڵ بەدەستهێنا.
خەڵاتی (لۆریال - یونسکۆ) ساڵانە دەبەخشرێت بە ژمارەیەک لەو خانمانەی دەتوانن لە زانستدا داهێنان بکەن بۆ ئەمساڵ بە شەش ژنی داهێنەر لە شەش وڵاتی جیاواز بەخشرا و د.هێژا وەک نوێنەری عێراق خەڵاتەکەی وەرگرت.
خەڵاتەکە، بەشێکە لە پرۆگرامێکی نێودەوڵەتی کە رێز لە توێژەرانی سەرکەوتو دەگرێت لە بوارەکانی زانست و ئەندازیاری و تەکنەلۆژیا و چەند پسپۆڕییەکی تر.
ساڵی رابردوش، هەمان خەڵات بە ژنە مامۆستایەکی زانکۆی سلێمانی بەناوی (د.دێرین نەجات) بەخشرا، کە ئەویش بەهەمان شێوە وەک نوێنەری عێراق بەشداری کردبو.