سەردار محەمەد

لەکوردستان بەدەگمەن ژنێک جورئەتی ئەوە دەکات بەدەنگی بەرز و بەڕاشکاوی بڵێ: "هەوڵی لاقەکردنم دراوە”، وەک ئەوەی "رێناز تۆفیق" چەند رۆژێک لەمەوبەر درکاندی.

بەڵام ئەم جورئەتی وتن ‌و درکاندنە، لەبری ئەوەی ببێتە مایەی دەستەبەرکردنی پشتیوانی بۆ هەمو قوربانییەکی گێچەڵی سێکسی لەکوردستاندا (کە دیاردەیەکی زۆر بەربڵاوەو بەشاراوەیی ئەنجامدەدرێ)، ماشێنێکی گەورەی سوکایەتی پێکردن لەدژی خرایە گەڕ! لەبەشێک لەمیدیای ناپیشەیی‌و لەسۆشیال میدیادا.

تەنانەت کار گەیشت بەوەی بەشێک لەوانەی خۆیان بە رەخنەگری سەرسەختی دەسەڵاتی کوردی دەزانن، ستایشی لاقەکار و سەرکۆنەی قوربانییان کرد! لەبەرئەوەی رێناز، راوێژکاری سەرۆکی حکومەت ‌و مانگانە ٦ ملیۆن دینار موچە وەردەگرێت!!

وەک ئەوەی ئەوە تەنها رێناز بێت کە مانگی ٦ ملیۆن دینار لەبەرامبەر (هیچ)دا وەربگرێت!

لەکاتێکدا سەدان پیاو لەم هەرێمەدا هەن توانا و کارامەییان هەر لەئاستی رێناز و کەمتریشدایە، هەمان موچە، پلە و پۆست ‌و ئیمتیازی زیاتریشیان پێدراوە و کەس ناویشیان ناهێنێت.

هەر لەڕاستیشدا، ٩٥٪ـی ئەوانەی لەکوردستاندا خەریکی حزبایەتی ‌و سیاسەتن کەسانی "گەمژە"و مشەخۆرو ساختەچین، هەر لە راوێژکار و پەرلەمانتار و کادیری باڵای حزبییەوە بگرە تا دەگات بەوەزیر و گزیر و سەرۆکی حزبیش.

"راوێژکاربون ‌و وەرگرتنی موچەی قەبەو بەلاش" لەکوردستاندا بابەتێکە و "گێچەڵی سێکسی" بابەتێکی دیکە، پێویست ناکات ئەویان بکرێت بە پاساو بۆ ئەمیان ‌و شەرعیەت بەدەستدرێژییکردنە سەر ژنێک‌ و هەوڵی لاقەکردنی بدرێت!

پێویست ناکات خاڵی کرۆک ‌و بنەڕەتی بابەتەکە، کە "گێچەڵی سێکسییە"، لەژاوەژاوی "راوێژکاریی‌و موچەی ٦ ملیۆن دینار"یدا بشاردرێتەوەو ون بکرێت.

هەمو ئەوانەی کە ئاو دەکەن بەئاشی تۆمەتبارکردنی قوربانیدا و بەشایستەی ئەو جۆرە هەڵسوکەوتەی دەزانن، پێبزانن‌ یان نەزانن خزمەت بە"توندوتیژیی سێکسی"و بەشداری لەپاساوهێنانەوە و پشتگیریکردنی دەستدرێژکار و ستایشی "گێچەڵی سێکسی" دەکەن! لەکاتێکدا ئەمە دیاردەیەکە لەهەمو کات ‌و شوێنێکدا، وەک ئەرکێکی ئەخلاقی پێویستی بەڕێگری ‌و بەرەنگاربونەوەیە.

بڕەودان بەمجۆرە تێڕوانین‌و بیرکردنەوە زیانبەخشە لەڕای گشتیدا، ئەو باوەڕە لەمێشکی قوربانییەکانی گێچەڵی سێکسی ئێستاو داهاتوی کوردستاندا دەچەسپێنێت، کە پێویستە لەبەرامبەر دزێوترین کردەوەی نامرۆیی‌و بێ ئەخلاقیدا دەرهەقیان دەکرێت، تەواو بێدەنگ بن‌و جورئەت نەکەن جارێکیتر چیرۆکی خۆیان بگێڕنەوە، بۆ ئەوەی تۆمەتبارو تاوانبار نەکرێن!