كاوه شێخ عه‌بدوڵڵا
ئێستا لە تورکیا و هەرێمی کوردستان هەواڵی گرنگ، هاتنوچونی ژنێک و چەند پیاوێکە بۆ لای سەرۆک و سیاسەتمەدارە شتبەدەستەکانی ئەم ناوچەیە. سەردانەکانیش سەردانی رۆتیناتی رۆژانە نین، بەڵکو لەوانەیە چارەنوسی شەڕ و خوێنڕشتنی سەدەیەک کۆتایی پێبهێنێ. تاقانە ژنەکەی ناو شاندە بەرچاوەکە (پەروین بوڵدان)ـە.
پەروین کاتێک ژنێکی گەنج بو سیاسەتمەدار نەبو، بەڵکو پاش کوژرانی بەناحەقی مێردەکەی، ئیتر بەبێ ئەوەی مەبەستی بوبێ، بو بە ژنە سیاسەتمەدارێک لەسەر گۆڕەپانی ئاڵۆزی تورکیادا.
پەروین لە مانگەکانی کۆتایی ساڵی ١٩٦٧ لەشاری (جۆلەمێرگ) کە ناوەندی پارێزگای (هەکاری)یە لە باکوری کوردستان لە دایکبوە. دوای تەواوکردنی قۆناغی ئامادەیی، ناچێتە زانکۆ، بەڵکو دەبێتە فەرمانبەری میریی.
ماوەی فەرمانبەرییەکەی زۆر ناخایەنێت، لەسەر نەریتی ئەوسای کوردەواریی، لە تەمەنی ١٩ ساڵاندا مارە دەکرێت لە کوڕە مامێکی خۆی بەناوی (ساواش بوڵدان) لە ساڵی ١٩٨٧ـدا.
ژیانی ژنومێردایەتی پەروین و ساواش تاڕادەیەکی زۆر ئارام و بێکێشەبوە. بەهۆی کاری بازرگانییەوە خێزانێکی تێر و پۆشتەوپەرداخ بون. پاش ماوەیەک ژیان لە جۆلەمێرگ، ساڵی ١٩٩٠ پەروین و ساواش ماڵیان بار دەکات بۆ شاری ئیستەنبوڵ.
لە ئیستەنبوڵ یەکەم مداڵیان لەدایک دەبێت کە کوڕێکە بەناوی (نێچیرڤان بوڵدان)، بەڵام زۆر ناخایەنێت کە ساواشی مێرد و ئامۆزای پەروین دەکەوێتە ژێر چاودێری چڕی پۆلیس و میتی تورکیاوە. چەند جارێک هەڕەشەی لێدەکرێت بەبیانوی ئەوەی بە پارە یارمەتی پەکەکە دەدات!
ساڵی ١٩٩٤ رۆژی ٢ـى مانگی ٦ـ لەڕێی تەلەفۆنەوە پەروین ئاگادار دەکرێتەوە کە ساواشی مێردی و دو هاوڕێی تری لەلایەن چەند کەسێکەوە رفێنراون. ئەو شەوەی بۆ بەیانییەکەی ساواش دەڕفێنرێت لە ترسی هەڕەشەکان لە ماڵەوە ناخەوێت و پەروین ئاگادار دەکاتەوە کە دەچێتە ئوتێلێکی ئیستەنبوڵ تا دور و سەلامەتبێ لە هەڕەشەکەران!
ئەو کاتەی هەواڵی رفاندنی ساواش بە پەروین دەگات، ئەحەپەسێ، یەکسەر لە هۆش خۆی دەچێ و دەیگەیەننە نەخۆشخانە. هەر بەهۆی ئەو ترس و لەرزەی چوەتە گیانییەوە، پەروین دوەم مناڵی کە کچێکە، بە هەشت مانگیی دێتە دنیاوەو دواتر ناوی دەنێت زەلال!
دو رۆژ پاش رفاندنی ساواش بوڵدان و هاوڕێکانی بەناوەکانی عەدنان یەڵدرم و حاجی کاریا، رۆژی ٤ـى ٦ـى ١٩٩٤پۆلیس تەرمەکانیان دەدۆزێتەوە کە ئاسەواری لێدان و ئەشکەنجەی زۆر بە جەستەیانەوە دیاربو و کاسەی سەریان شکێنرابو!
ساڵی یەکەمی ئەو کارەساتەی بەسەریدا هات، پەروین بە بەخێوکردنی کچە تازە لەدایکبوەکەی و کوڕەکەی بردیەسەر، بەڵام دواتر خۆی تەرخانکرد بۆ خەبات دژی کوشتن و بێسەروشوێنکردنی کورد لە تورکیا کە ئەو ساڵانە بوبوە دیاردەیەکی زەق لە تورکیا و باکوری کوردستان.
ئیتر لێرەوە پەروینی مێردکوژراوی دڵشکاو، بو بە پەروینێکی ناسراو لەسەر ئاستی تورکیا و باکوری کوردستان. لە پای خەبات و دەرکەوتنەکانی، ساڵانی داهاتو کاندیدکرا بۆ وەرگرتنی خەڵاتی نۆبڵ بۆ ئاشتی. هەروەها دوای دو هەوڵی سەرنەکەوتو بۆ چونی بۆ پەرلەمان، دواجار ساڵی ٢٠٠٥ بویە ئەندامی پەرلەمانی تورکیا.
پەروین ئێستا ئەندامی شاندێکە کە بۆ مەسەلەیەکی زۆر گرنگی وەک پرۆسەی ئاشتی لە تورکیا، دەچێتە سەر مێزی هەمو سەرۆک و سیاسەتمەدار و بڕیاربەدەستەکانی تورکیا و هەرێمی کوردستان. ئەمانە نیشانی دەدەن کە پەروین متمانەیەکی زۆری هەموانی بەدەستهێناوە تا بۆ پرۆسەیەکی ئاوا گرنگ و چارەنوسساز ئەرکی خراوەتە سەرشان.