“مەرجە قورسەکانی هاوسەرگیری و جیابونەوە هۆکارن بۆ زیادبونی توندوتیژی و کوشتنی ژنان”

2022/05/08    521 جار بینراوە
 
* نەوژین
 
چالاکێکی بواری ژنان پێیوایە قورسکردنی مەرجەکانی هاوسەرگیریی و جیابونەوە هۆکارن بۆ زیادبونی حاڵەتەکانی توندوتیژی و لەنێویشیدا کوشتنی ژنان، داواش دەکات بنەما و رێکارەکانی ئەو دو پرۆسەیە ئاسان بکرێن.
 
بەهار شوکریە مونزیر، لە نوسینێکدا لە هەژماری خۆی لە فەیسبوک دەڵێت: ئێمە پێویستە کار لەسەر ئاسانکردنی پەیوەندی نێوان کچ  و کوڕ بکەین، چ پێکەوەبوونی ئازادانە و  بێ قەید و بەندی خێزان، کۆمەڵگە، یاسا، هەمان کات بۆ جیابوونەوە. 
 
پێیشیوایە زۆربەی حاڵەتەکانی کوشتنی ئەم 5 مانگەی هەرێمی کوردستان پەیوەندی بە کێشەی نێوان ژن و پیاوەوە هەبوە کە زۆر سەختکراوە لەسەریان.
 
دەشڵێت: زۆرێک لە گەنجان کێشەی هاوسەرگیریان هەیە و سەختدەکریت لێیان، کێشەی ئابوری دانانی کۆمەڵێك مەرجی ناپێویست وەكو: ئاڵتون، سەیارە، ئاهەنگ و شەکراو، ئەمانە هەموو قورسایی دروستدەکەن بەتایبەت بۆ کوڕ و خێزانی کوڕ.
 
زیاتر دەڵێت: کچانیش خۆیان لە ژێر فشاردا دەبیننەوە لەتاو ئەو نەریتەی کە ژن دەبێت بە کۆمەڵێك پرس دا بڕوات تاکو هاوسەرگیرییەکە دەکات.
 
بەهار مونزیر، بە پێویستی دەزانێت کچان و کوڕان دەستکراوەتر بن بۆ پێکەوە ژیان و بەهەمانشێوە ئازاد بن بۆ لەیەک جیابونەوە، تاکو وەکخۆی دەڵێت: “کارەسات نەخوڵقێت”. بۆ ئەمەش نمونەی بەشێک لەو روداوانە دەهێنێتەوە کە بە هۆکاری کێشە لە جیابونەوەدا ژنان روبەڕوی کوشتن و بریندارکردنی سەخت بونەوە، لە نمونەی کەیسی سوتاندنی (شنیار) و چەقۆدان لە (نیان).
 
دەشڵێت: “مرۆڤەکان قەید و بەند و باری ئابوری خراپ و تەداخولی بێ مانا، ژیانیان تێکدەدات”.
 
 


Newjin.net - 2024
ژمارەی سەردان 1,305,821     ژمارەی میوان 665

دروستکراوە لەلایەن کۆمپانیای (کۆدتێك)ەوە