* نەوژین
ئینستتیوتی پەی سیڤی پارلەمانتارانی خولی شەشەمی پارلەمانی کوردستانی بڵاوکردەوە و بەپێی سیڤیەکان بێت، زۆرینەی ژنە پارلەمانتارەکان خاوەنی بڕوانامەی بەکالۆریۆسن و تەنها دو ژنە پارلەمانتار بڕوانامەی ئامادەییان هەیە.
لە راپۆرتەکەدا کە دەکاتە یەکەم راپۆرتی تایبەت بە خولی شەشەمی پارلەمانی کوردستان لە چوارچێوەی پرۆژەی رێکخراوەکە بۆ چاودێریی کارەکانی پارلەمانی کوردستان بە پاڵپشتی سندوقی نیشتمانی بۆ دیموکراسی (NED)، چەند تەوەرێک باسکراوە وەک بەڵێنەکانی هەڵبژاردن و ئیمتیازاتی پارلەمانتاران لەگەڵ سیڤی هەمو پارلەمانتاران.
بەپێی راپۆرتەکەدا، ١٩ ژنە پارلەمانتار خاوەنی بڕوانامەی بەکالۆریۆسن، ٥ـیان دکتۆرایان هەیە، ٣ـیان دبلۆم، ٢ـیان ماستەر و دوی دیکەشیان تەنها بڕوانامەی ئامادەییان هەیە.
دابەشبونیان بەسەر حزبەکان بەمشێوەیە؛ ژنانی پارلەمانتار لەسەر لیستی پارتی دیموکراتی کوردستان کە ژمارەیان ١٣ پارلەمانتارە (٧ـیان خاوەنی بڕوانامەی بەکالۆریۆس، ٤ـیان خاوەنی بڕوانامەی دکتۆرا، ١ـیان خاوەنی دبلۆم و یەکێکیش خاوەنی بڕوانامەی ماستەرە).
ژنانی پارلەمانتار لەسەر لیستی یەکێتی نیشتیمانی کوردستان کە ژمارەیان ٨ پارلەمانتارە (٦ـیان خاوەنی بڕوانامەی بەکالۆریۆس، ١ـیان خاوەنی ماستەر و یەکێکیش خاوەنی بڕوانامەی ئامادەییە).
ژنانی پارلەمانتار لەسەر لیستی جوڵانەوەی نەوەی نوێ کە ژمارەیان ٣ پارلەمانتارە (٢ـیان خاوەنی بڕوانامەی بەکالۆریۆس و دانەیەکیشیان بڕوانامەی ئامادەیی هەیە). یەکگرتوی ئیسلامی دو ژنە پارلەمانتاری هەیە، هەردوکیان بڕوانامەی بەکالۆریۆسیان هەیە. کۆمەڵی دادگەریش ژنە پارلەمانتارێکی هەیە خاوەنی بڕوانامەی بەکالۆریۆسە لە یاسا.
بەرەی گەل ـیش ژنە پارلەمانتارێکی هەیە کە خاوەنی بڕوانامەی دبلۆمە، هەروەها پێکهاتەی تورکمانیش خاوەنی ژنە پارلەمانتارێکن کە ئەویش خاوەنی بڕوانامەی بەکالۆریۆسە لە یاسا.
لە هەڵبژاردنی خولی شەشەمی پارلەمانی کوردستان، ١٠٠ کەس وەک پارلەمانتار هەڵبژێردران و لەو ژمارەیەش ٣١یان ژنن، لەکۆی ٣١ ژنە پارلەمانتارەکە تەنها ٥ـیان بە دەنگی خۆیان توانیان کورسی مسۆگەر بکەن.