* نەوژین

ئەنجومەنی دادوەری هەرێم ئاماری هاوسەرگیری و جیابونەوەی ساڵی رابردوی دادگاکانی هەرێمی بڵاوکردەوە و بەپێی ئامارەکە، لە هەولێر و گەرمیان رێژەی هاوسەرگیریکردن زیادی کردوە و لە سلێمانیش جیابونەوە، هەر بەپێی ئامارەکە ٩٨ پیاو ژنی دوەمیان هێناوە و چەندین ژنیش بەهۆی هێنانی ژنی دوەم لەلایەن هاوسەرەکانیانەوە جیابونەتەوە. 

ئەنجومەنی باڵای دادوەری هەرێمی کوردستان، ئەمڕۆ سێشەممە (١٨ـی ئادار) ئامار و داتای دادگای پێداچونەوەی هەرێم و دادگاکانی تێهەڵچونەوەی هەولێر، سلێمانی، دهۆک و کەرکوک- گەرمیانی بڵاوکردەوە.

بەپێی ئامارەکان، لەماوەی ساڵی ٢٠٢٤، ٥١ هەزار و ١٨ هاوسەرگیری ئەنجامدراوە، کە دابەشبونی بەسەر ناوچەکان بەمشێوەیە بوە: هەولێر ١٧٥٩١ هاوسەرگیری، سلێمانی ١٨٥٢٢ هاوسەرگیری، دهۆک ١٢١٩٩ هاوسەرگیری و گەرمیان- کەرکوک ٢٧٠٦ هاوسەرگیری.

بە گوێرەی ئەم ئامارە ساڵی رابردو بەراورد بە ساڵی رابردوتر (٢٠٢٣)، هاوسەرگیری لە هەولێر و گەرمیان زیاد و لە سلێمانی و دهۆک کەمیکردوە، بەشێوەیەک ساڵی ٢٠٢٣، رێژەی هاوسەرگیری بەمشێوەیە بوە: هەولێر ١٧٥٤٣ هاوسەرگیری، سلێمانی، ٢٠٤٢٧ هاوسەرگیری، دهۆک ١٢٤٩٩ هاوسەرگیری، گەرمیان- کەرکوک ٢٦١٨ هاوسەرگیری ئەنجامدراون.

لەبەرامبەردا ١٢ هەزار و ٣٨٤ جیابونەوەی هاوسەران تۆمارکراوە، کە دابەشبون بەپێی ناوچەکان بەمشێوەیە بوە: هەولێر ٣٨٧٨ جیابونەوە، سلێمانی ٥٧٤٥ جیابونەوە، دهۆک ٢٠٣٣ جیابونەوە، گەرمیان- کەرکوک ٧٢٨ جیابونەوە.  

بە گوێرەی ئامارەکە جیابونەوەی هاوسەران لە هەولێر، دهۆک و گەرمیان کەمیکردوە، بەڵام لە سلێمانی زیادیکردوە، بەشێوەیەک ساڵی ٢٠٢٣، رێژەی جیابونەوە بەمشێوەیە بوە: هەولێر ٥٨٥٧ جیابونەوە، سلێمانی ٥٤٣٨ جیابونەوە، دهۆک ٢١٦٤ جیابونەوە و گەرمیان- کەرکوک ٨٥٣ جیابونەوە.

لەبارەی هۆکارەکانی جیابونەوە، ئەنجومەنەکە بە وردی رونیکردوەتەوە، بە پلەی یەک ئەو کەسانەی لەخوار تەمەنی ١٨ ساڵی هاوسەرگیریان کردوە بە هۆکاری نەگونجان لەگەڵ یەکتر جیابونەتەوە، پاشان هۆکاری جیاوازی تەمەن بوەتە هۆی جیابونەوەی زۆرترین هاوسەر، نەزۆکی و داوێن پیسی (خیانەت)ـیش بە پلەی سێ و چوار زۆرترین کەسیان لێکجیاکردوەتەوە، هەروەها بەهۆی هێنانی ژنی دوەم لەلایەن هاوسەرەکانیانەوە لە هەولێر ١٦٣ ژن و لە دهۆک ١٣٧ ژن لە هاوسەریان جیابونەتەوە، راپۆرتەکە ئاماژەی بە شارەکانی دیکە نەکردوە. 

لەهۆکارەکانی تری جیابونەوە بەپێی ئامارەکە: نەبونی ماڵی جیا، تەکنەلۆژیا، توشبون بە نەخۆشی، هۆکاری کۆمەڵایەتی، هۆکاری ئابوری، هۆکاری ئاینی و ئاڵودەبون بە ماددەی هۆشبەرن.

هەر لە راپۆرتەکەدا هاتوە، ساڵی رابردو رێگە بە ٩٨ پیاو دراوە ژنی دوەم بهێنن، کە بەپێی ناوچەکان بەمشێوەیە بوە: لە هەولێر ٤٥ پیاو، لە سلێمانی ١٩ پیاو، لە دهۆک ٣٤ پیاو، لە گەرمیان هیچ پیاوێک ژنی دوەمی نەهێناوە.