* نەوژین
سەندیکای رۆژنامەنوسانی کوردستان دروستکردنی بۆردی تایبەت بە ژنانی رۆژنامەنوس رادەگەیەنێت، جێگری سەرۆکی سەندیکاکەش دەڵێت: ئامانج لێی پاڵپشتیکردن و داکۆکیکردنە لەمافەکانی ژنانی رۆژنامەنوس.
بژار حەکیم، جێگری سەرۆکی سەندیکای رۆژنامەنوسانی کوردستان، بە نەوژینی راگەیاند: لە کۆتا کۆبونەوەی سەندیکا کە رۆژی (٩ـی ئادار) بەڕێوەچو، وەک ئەندامانی ئەنجومەن بڕیارماندا بە دروستکردنی بۆردی تایبەت بە ژنانی رۆژنامەنوس، ئەمەش لە سۆنگەی بەرگریکردنی سەندیکای رۆژنامەنوسان لە ژنانی رۆژنامەنوس.
رونیکردەوە: کاری بۆردەکە پاڵپشتیکردن و داکۆکیکردن لە مافەکانی ژنانی رۆژنامەنوس لە دەزگاکانی راگەیاندن دەبێت، هەروەک بۆ زیاتر بەرگریکردنە لە مافەکانیان لەنێو گرێبەستەکانیان لەگەڵ دەزگاکان.
لە کۆتا کۆنگرەی خۆی دا، لە ساڵی ٢٠١٣ کە کۆنگرەی سێیەم بو، سەندیکانی رۆژنامەنوسان لیژنەی مێینەی دروستکرد، بەڵام لەدوای ماوەیەک کارکردن بەهۆی ناچالاکیان لیژنەکە هەڵوەشایەوە، جێگری سەرۆکی سەندیکای رۆژنامەنوسان، جەختیکردەوە ئەمجارە بۆردەکە کاری جدی دەکات، بەشێوەیەک کاری بۆردەکە هەموی بە ژنانی رۆژنامەنوس خۆیان سپێردراوە، هەروەک سەرۆکی بۆردەکەش ژنێکە.
بۆردەکە لە حەوت ئەندام پێکدێت و لەدوای دروستبونیشی لەماوەیەکی کەم دەستبەکاردەبن.
لە کۆبونەوەی دوێنێی ئەنجومەنی سەندیکا، هەروەها باس لە ئەنجامدانی کۆنگرە کراوە، لەوبارەیەوە بژار حەکیم، وتی: هەمو هەوڵێکمان بۆ ئەوەیە لەمساڵ دا کۆنگرە ببەستین. لەبارەی هۆکاری ئەنجامنەدانی کۆنگرە لە کۆتا ١٢ ساڵ دا، وتی: بەهۆی دۆخی هەرێمی کوردستانەوە بوە.
لەبارەی بەشداری ژنانیش لە کۆنگرە ئاماژەی بەوەکرد: بێگومان لەکاتی نزیکبونەوەی کۆنگرە بڕیار لەسەر ئەوە دەدەین و بیرمان لای ئەوەیە زۆرترین ژنە رۆژنامەنوس تێیدا بەشداربن.