* نەوژین

نوسینگەی رزگارکردنی رفێندراوانی ئێزیدی لە هەرێمی کوردستان، ئاماری نوێی ئازادبوان و رفێندراوانی ئێزیدی بڵاوکردەوە و بەپێی ئامارەکە هێشتا چارەنوسی زیاد لە هەزار کچ و ژن نادیارە. 

نوسینگەکە ئاشکرایکردوە: کۆی گشتی ژمارەی رفێندراوان؛ ٦٤١٧ کەس بوە، کە لەو ژمارەیە ٣٥٤٨ـیان لە رەگەزی مێ بون. کۆی گشتی ٣٥٨٥ـیان رزگارکراون، کە لەو ژمارەیە ١٢١١ـیان ژن و ١٠٧٤ـیان کچ ـن.

نوسینگەکە لە نوێترین ئاماری ئاماژەی بە ژمارەی ئەو رفێندراوانەش کردوە کە بەدەستی داعش کوژراون و تەرمەکانیان لە نێو گۆڕە بەکۆمەڵەکان دۆزراونەتەوە، بەپێی ئامارەکە ژمارەیان ٢٧٤ کەسە؛ ٣٧ـیان لە رەگەزی مێ ـن.

لە مانگی ئابی ٢٠١٤ قەزای شەنگال و گوندەکانی روبەروی پەلاماری چەکدارانی داعش بونەوە، هەزاران ئێزیدی کوژران و رفێندران، هەروەک لە ١٥ تشرینی ٢٠١٥ قەزاکە ئازادکرایەوە، بەڵام هێشتاش بەشێک لە خەڵکی شارەکە بە ئاوارەیی ماونەتەوە و لە کەمپەکان دەژین، ئەوەش بەهۆی نەمانی ماڵ و حاڵیان.