گەلان: زیاتر لە ٦٠٠ بابەتی تایبەت بە پرسی ژنم وەرگێڕاوەتە سەر زمانی کوردی

2025/02/21    711 جار بینراوە


* نەوژین

لەرۆژی جیهانی زمانی دایک دا، گەلان کە کچە وەرگێڕێکی کوردە، دەڵێت: تاوەکو ئێستا زیاتر لە ٦٠٠ بابەتی تایبەت بە پرسی ژنم وەرگێڕاوەتە سەر زمانی کوردی، دەشڵێت: ئامانجم وەرگێڕانی زۆرترین بابەتە بۆسەر زمانی کوردی.

گەلان جەبار، ٢٤ ساڵ، دانیشتوی قەزای چۆمانی سەر بە ئیدارەی سۆرانە و دەرچوی بەشی ئادابی ئینگلیزی زانکۆی سۆرانە، ماوەی زیاتر لە پێنج ساڵە دەستی بەکاری وەرگێڕان کردوە، دەڵێت: وەرگێڕان زیاتر بۆ ئەو بابەتانە دەکەم کە پێشتر نەکراون بە کوردی، بەشێوەیەک کاتێک گەڕان بۆ بابەتێک دەکەم، گەر بە زمانی کوردی دەستمنەکەوێت، دەگەڕێم بە زمانی ئینگلیزی و زانیارییەکان لەبارەیەوە دەکەمە کوردی. 

دەشڵێت: ئامانجم وەرگێڕانی زۆرترین بابەتە بۆسەر زمانی کوردی، بۆ ئەوەی بە زمانی کوردیش زانیارییەکان دەستبکەون. زمانی کوردی دەوڵەمەند بە زاراوەکانە و زمانێکی مێژوییە، زۆر کۆنترە لە زمانی عەرەبی و فارسی، جێگەی نیگەرانییە کە خوێنەری کورد و فێرخوازی کورد بەدوای زانیاریەک دا بگەڕێن و بە کوردی دەستنەکەوێت، هەروەک ئامانجمە گەلانی دیکە ئاشنا بە زمانی کوردی و کوردەکانیش ئاشنا بە زمان و کلتوری دیکە بکەم.

گەلان، وەرگێڕان زیاتر لە بوارەکانی؛ ئەدەبی، فەلسەفی، هونەری و بابەتی تایبەت بە پرسی ژنان دەکات، وەکخۆی دەڵێت: لە سەرەتای دەستپێکردنم بە کاری وەرگێڕان تەنها بابەتم لەبارەی ژنانەوە وەردەگێرا، ژیاننامە و بابەتانێکم لەسەر ژنانی فەیلەسوف، نوسەر و زانا وەرگێڕان بۆ دەکرد کە پێشتر نەکرابێتن بە کوردی. بەشێوەیەک لەوکاتەوە ٦٠٠ بابەتی تایبەت بە ژنانم وەرگێڕاوە.

“ئەو وەڕگێڕانانەی من لە بواری ژنان کردومە و دەیکەم زیاترە لە پەیوەندی مانا، لە کۆمەڵگای سەرمایەداری و نێرسالاریدا ئێمە زیاتر پێویستە لە پرسی ژن تێبگەین و خوێندنەوەی زیاتری بۆ بکەین، چونکە لە زۆربەی باسی مێژویدا ژنان نەناسراون”.، گەلان وای وت، وتیشی: وەک کچێک بەردەوام دەبم لەسەر کارکردن لەم پرسە و دەبمە دەنگێک بۆ ژنان.

لەساڵی ١٩٩٩ـەوە رۆژی ٢١ـی شوباتی لەلایەن رێخراوی یونسکۆوە بە رۆژی جیهانی زمانی دایک دیاریکراوە، ئامانج لێی بەرزکردنەوەی ئاستی هۆشیاریە بەرامبەر بە فرەزمانی و فرەفەرهەنگی لە جیهاندا. 
 



Newjin.net - 2025
ژمارەی سەردان 2,420,002     ژمارەی میوان 606

دروستکراوە لەلایەن کۆمپانیای (کۆدتێك)ەوە