* نەوژین
یەکێک لە سەرپەرشتیارانی فیستیڤاڵی بازاڕ لە کەلار، ئاشکرایدەکات، بەراورد بە ساڵانی پێشو، بەشداری ژنانی خاوەنکار لە فیستیڤاڵەکە زیادیکردوە.
سبەی پێنجشەممە (١٤ـی تشرینی دوەم)، پێنجەمین فیستیڤاڵی بازاڕ لە کەلار دەستپێدەکات و بڕیارە بۆماوەی سێ رۆژ بەردەوامی هەبێت.
لەبارەی بەشداری ژنان تێیدا، محەمەد نوری، یەکێک لە سەرپەرشیارانی فیستیڤاڵەکە، بە نەوژینی وت: لەکۆی ٣٠٠ کەپر کە سبەی بۆ فیستیڤاڵەکە ئامادەکراون، بە نزیکەیی ٧٦ـیان لەلایەن ژنانەوە گیراون، کە بەشێک لە کەپرەکان بە هاوبەشی گیراون، بەشێوەیەک دو ژنی خاوەنکار پێکەوە کەپرێکیان گرتوە، ئەمەش بەراورد بە چوار ساڵی رابردو کە فیستیڤاڵەکە کراوە، ژمارەیان زیادیکردوە.
زیاتر وتی: لەنێو کەپرەکان نرخی ئەو کەپرانەمان کەمتر کردوەتەوە کە تایبەت بە خواردنی کوردەواری و کاری دەستین، کە ساڵانە زیاتر لەلایەن ژنانەوە دەگیرێن.
ئاماژەی بەوەشکرد: هاوشێوەی چوار ساڵی رابردو، ژنان زیاتر بە کاری دەستی و بەرهەمی خۆماڵی بەشدارن، لەگەڵ ئەوەش دا بەشێکی زۆریان لەگەڵ کۆمپانیاکان بەشداریانکردوە.