٩ پۆستی زانستی و کارگێڕی زانکۆی گەرمیان بە ژنان سپێردران

2023/11/13    545 جار بینراوە

 

* نەوژین

نۆ پۆستی زانستی و کارگێڕی زانکۆی گەرمیان بە ژنان سپێردران، سەرۆکی زانکۆکەش دەڵێت: بەردەوام دەبین لە پێدانی پۆستە زانستی و کارگێڕیەکان لەسەر بنەمای توانای خۆیان بە ژنان.

ئەمڕۆ دوشەممە (١٣ـی تشرینی دوەم) لە زانکۆی گەرمیان ٩ پۆستی زانستی و کارگێڕی بە ٩ ژن بەخشران، کە بریتین لە پۆستەکانی (یاریدەدەری راگری کۆلێژ، سەرۆک بەش و بەڕێوەبەر).

لەوبارەیەوە د.فەرهاد قادر، سەرۆکی زانکۆی گەرمیان، بە نەوژینی راگەیاند: ئەمڕۆ نۆ پۆستی زانستی و کارگێڕی زانکۆی گەرمیانمان بە ژنان سپارد، کە بریتین لە (دیاریکردنی ژنێک بە یاریدەدەری راگری کۆلێژ، دانانی ٥ ژن بۆ پۆستی سەرۆک بەش و سێ ژنیش پۆستی بەڕێوەبەریان پێ سپێردراوە).

رایشیگەیاند: بەردەوام دەبین لە پێدانی پۆستە زانستی و ئیداریەکان لەسەر بنەمای توانای خۆیان بە ژنان، وەک سەرۆکی زانکۆش زۆر بە گرنگی دەزانم هێنانە پێشەوەی ژنان بۆ وەرگرتنی پۆستە باڵا زانستی و کارگێڕیەکانی زانکۆ.

لە مێژوی زانکۆی گەرمیان ئەمساڵ دەبێتە یەکەم ساڵ کە ٧ سەرۆک بەش لەلایەن ژنانەوە بەڕێوەببرێن و یەکەمجاریشە پۆستی یاریدەدەری راگری کۆلێژێک بە ژنێک بسپێردرێت.



Newjin.net - 2024
ژمارەی سەردان 1,355,647     ژمارەی میوان 637

دروستکراوە لەلایەن کۆمپانیای (کۆدتێك)ەوە