دو کچ لە هەڵەبجە دیواری شوێنە گشتییەکان دەنەخشێنن

2023/10/07    687 جار بینراوە

 

* نەوژین

دو کچی شاری هەڵەبجە دیواری شوێنە گشتییەکان بە وێنە دەنەخشێنن و دەڵێن: ئامانجمان لەکارەکە ئەوەیە مناڵان بە سەیرکردنیان دڵخۆشبن و بێئومێد نەبن.

سەلوا مستەفای ٢٨ ساڵ و هەتاو کەریمی ٣١ ساڵ، دو کچی وێنەکێشی دانیشتوی شاری هەڵەبجەن، ئەوان پەرەیان بە خەونی مناڵیان کە وێنەکێشان بوە داوە و لە ئێستا دا هەردوکیان وێنەکێشن.

پێکەوە مناڵان و مناڵانی خاوەنپێداویستی تایبەت فێری وێنەکێشان دەکەن، لەگەڵ ئەوەدا شوێنەگشتیەکانی ناوشارەکەیان وەک: نەخۆشخانەی مناڵان، خوێندنگە و باخچەکان دەنەخشێنن.

دەڵێن: کارکردن لەگەڵ مناڵان چێژێکی تایبەتی هەیە و ئارامیمان پێدەبەخشێت.

پێکەوە ساڵانێکە کاری شێوەکاری دەکەن، ئەوان خاوەنی پێشەنگای تایبەت بە خۆیانن و بەشداریان لە چەند پێشەنگایەکی نێوخۆیش دا کردوە.

وەک هەتاو ئاماژەی پێکرد: پێکەوە بەشداریمان لە چەندین پێشەنگا کردوە و خۆم خاوەنی دو  پێشەنگای تایبەت بەخۆمم کە یەکەمیانم لە ساڵی (٢٠١٣) کردەوە و دوەمیشیان لەساڵی (٢٠١٨) و بەناوی (بەرەو گوڵستان) کردەوە.

دیوارەکان دەنەخشێنن، بە ئامانجی ئەوەی مناڵان بە سەیرکردنیان دڵخۆشبن.

خەیاڵ وتی: ئێمە دیوارەکان بەتەنها بۆ دابینکردنی بژێوی ژیانمان نانەخشێنین، بەڵکو ئەو جێگانە دەنەخشێنین کەوا زیاتر مناڵان سەردانیان دەکەن، بە ئامانجی ئەوەی بە سەیرکردنیان  دڵخۆشبن، نەترسن و بێئەمێد نەبن. 

هاوکات ماوەی چەند ساڵێکە پێکەوە لە هاوینان خولی فێرکاری بۆ هەردو رەگەز دەکەنەوە.

وەک سەلوا ئاماژەی پێکرد: لە خولەکان ئامانجمان تەنها فێرکردنی دەوروبەرمان نییە، بەڵکو ئامانجمانە لەڕێگەی خولەکانمانەوە کچان و کوڕان سودمەند ببن و لەداهاتو دا ببنە وێنەکێشی بەتوانا و بتوانن هونەرەکە بکەن بە پیشە.

 

 



Newjin.net - 2024
ژمارەی سەردان 1,421,961     ژمارەی میوان 461

دروستکراوە لەلایەن کۆمپانیای (کۆدتێك)ەوە