* نەوژین
ئەمشەو ژنە پزیشکیکی سەنتەری نەخۆشییەکان دڵ لە نەخۆشخانەی ئازادیی فێرکاری دهۆک، کۆتایی بە ژیانی خۆی هێناوە و هۆکاری روداوەکەش بە ناڕونی ماوەتەوە.
سەرچاوەیەکی تایبەت لە نەخۆشخانەی فێرکاریی ئازادیی لە شاری دهۆک، بە نەوژینی وت: ئەمشەو ژنە پزیشکێک بەناوی (هـ. ت. م) لە ماڵەوەی خۆیاندا کۆتایی بەژیانی خۆی هێناوە.
وتیشی: لەکاتی روداوەکەدا ژنە پزیشکەکە لە دەوامدا نەبوە، بەڵکو لە ماڵەوە بوە و بە لێدانی دەرزییەکی تایبەت کە هێشتا رون نەبوەتەوە چییە، کۆتایی بەژیانی خۆی هێناوە.
مەتین جەمیل، وتەبێژی بەڕێوەبەرایەتی گشتی تەندروستی دهۆک، سەرباری جەختکردنەوەی لە دروستی هەواڵەکە، بە نەوژینی وت: روداوەکە رێک کاتژمێر ٨ و نیوی شەو رویداوە، هەروەک هێشتا هۆکاری روداوەکە نازانیین.
کۆچکردوەکە پزیشکی نیشتەجێی دێرین بوە لە سەنتەری دڵی نەخۆشخانەی ئازادیی و لەهەمان کاتدا فێرخوازی بۆردی کوردستانی نەخۆشییەکانی کرانەوەی سنگە.
لەئێستادا تەرمی ژنە پزیشکەکە لە پزیشکی دادوەریی دهۆکە و بڕیارە پاش توێکاریی بەخاک بسپێرێت.