پۆلیسی دهۆک: هەمو تاوانەکان رو لەکەمبونن، جگە لە تاوانی ئەلیکترۆنی

2025/03/26    97 جار بینراوە


* نەوژین

پۆلیسی دهۆک لەگەڵ بڵاوکردنەوەی دەستگیرکردنی دو تۆمەتبار کە هەڕەشەی بڵاوکردنەوەی وێنەیان لە کچان کردوە، دەڵێت: لە ناوچەکە هەمو تاوانەکان رو لە کەمبونن، جگە لە تاوانی ئەلیکترۆنی.

 هێمن سلێمان، وتەبێژی پۆلیسی دهۆک، لەمیانی گرتەیەکی ڤیدیۆیی دا، دەستگیرکردنی دو تۆمەتباری راگەیاند و وتی: لە ئەنجامی خراپ بەکارهێنانی ئامێرەکانی پەیوەندی کچ و کوڕێکمان دەستگیرکردوە کە هەڕەشەی بڵاوکردنەوەی وێنەیان لە کچان کردوە.
 
رونیکردەوە: کچ و کوڕەکە هاوڕێی یەکدین، کچەکە لە سناپچات ستریکی هاوڕێ کچەکانی لای خۆی هەڵگرتوە و دواتر وێنە و ڤیدیۆی هاوڕێ کچەکانی بۆ کوڕەکە ناردوە، ئەویش بۆ کچەکانی ناردوەتەوە و هەڕەشەی لێکردون.

ئاشکرایشیکرد: دەستگیرکردنەکە لەسەر سکاڵای یەکێک لە کچە قوربانییەکان بوە، لەدوای دەستگیرکردنیشیان تۆمەتباران دانیان بە تاوانەکەیان ناوە.

هەر لەگەڵ بڵاوکردنەوەی هەواڵەکە، وتەبێژی پۆلیسی دهۆک، رایگەیاند: هەمو تاوانەکان لە سنوری پارێزگای دهۆک بۆ ئەمساڵ رو لە کەمبونن، تەنها تاوانەکانی خراپ بەکارهێنانی ئامێرەکانی پەیوەندی نەبێت رۆژ لە رۆژ رو لە زیادبون دەکەن.



Newjin.net - 2025
ژمارەی سەردان 2,423,714     ژمارەی میوان 969

دروستکراوە لەلایەن کۆمپانیای (کۆدتێك)ەوە