* نەوژین
سەرۆکی هەرێمی کوردستان بەبۆنەی هەشتی مارس ـەوە پەیامێکی پیرۆزبایی بڵاوکردوەتەوە و تێیدا دەڵێت: ژنان له ته‌واوى كايه‌كانى ژياندا ئازایه‌تی و خۆڕاگريی خۆیان سه‌لماندوه، دەشڵێت: بۆ مسۆگه‌ركردنى مافه‌كانیان و پاراستنیان له توندوتیژی و جیاكاری كاری هەمەلایەنە و زیاتر پێويسته.
لە پەیامەکەی نێچیرڤان بارزانی، سەرۆکی هەرێمی کوردستان دا هاتوە: درێغی لە بنياتنانى كۆمه‌ڵگەیه‌ک ناکەین كه تێیدا ژن هاوبه‌شێكی راسته‌قينه بێت له دروستكردنی داهاتودا. ئێمه شانازی به پێگه و ده‌ستكه‌وته‌كانی ئافره‌تانى كوردستانه‌وه ده‌كه‌ین، به‌ڵام ئه‌وه‌ش ده‌زانین كه بۆ مسۆگه‌ركردنى مافه‌كانی و پاراستنی له توندوتیژی و جیاكاری، هه‌روه‌ها بۆ به‌هێزكردنی پێگه‌ی له هه‌مو كه‌رته‌كاندا، كاری هەمەلایەنە و زیاتر پێويسته.
دەشڵێت: كۆتاییهێنان به توندوتیژی دژی ژنان، پاراستنی مافه‌كانیان و دابینكردنی ژینگه‌یه‌ك كه به‌شداريی یه‌كسانیان له هه‌مو بواره‌كانى ژياندا مسۆگه‌ر بكات، به‌رپرسیاريه‌تییه‌كی گشتییه.
هەر لە پەیامەکەی سەرۆکی هەرێم دا هاتوە: ژن له كوردستان به درێژایی مێژو، له گۆڕه‌پانی خه‌باتی سیاسی و به‌ره‌نگاربونه‌وه، هه‌روه‌ها له ته‌واوى كايه‌كانى ژياندا، ئاماده‌يى، ئازایه‌تی و خۆڕاگريی خۆی سه‌لماندوه. ئه‌و به‌شێكی دانه‌بڕاو بوه له كاروانى ئازاديى كوردستان، ئه‌مڕۆش به‌رده‌وامه له‌ڕۆڵی خۆی له سیاسه‌ت، ئابوری، به‌ڕێوه‌بردن و په‌روه‌رده و به كارايى به‌شداريی له هه‌مو بواره‌كانی ژیاندا ده‌كات.
٨ـی مارس ـی هەمو ساڵێک لەلایەن نەتەوەیەکگرتوەکانەوە بە رۆژی ژنان دیاریکراوە، تاکو لەم رۆژەدا هانی ژنان بدرێت بوێرانە هەوڵبدەن و شانبەشانی پیاوان کاربکەن بەبێ بیرکردنەوە لە جیاوازی رەگەزی و وەستانەوە دژی زوڵم و توندوتیژی دژ بە ژنان.