هەڵەبجە دو ساڵە خاڵییە لە کوشتنی ژنان

2024/02/26    242 جار بینراوە

 

* نەوژین

بەڕێوەبەری بەڕێوەبەرایەتی بەرەنگاربونەوەی توندوتیژی دژ بە خێزان و ژنانی هەڵەبجە، ئاشکرایدەکات: لەماوەی ساڵی ٢٠٢٣ دا هیچ ژنێک لە سنوری پارێزگاکە نەکوژراوە، ئەوەش هاوشێوەی ساڵی پێشوتر.

بورهان ئەحمەد، بەڕێوەبەری بەڕێوەبەرایەتی بەرەنگاربونەوەی توندوتیژی دژ بە خێزان و ژنانی هەڵەبجە، بە نەوژینی راگەیاند: لە ماوەی ساڵی رابردو و دو مانگی سەرەتای ئەمساڵ دا، هیچ روداوێکی کوشتنی ژنان لە سنوری پارێزگای هەڵەبجە تۆمارنەکراوە، هەروەک تەنها یەک روداوی هەوڵی خۆکوشتنی ژنان تۆمارکراوە، کە ئەویش لە ژیاندا ماوە و گیانی لەدەستنەداوە.

هاوکات لە (٢٥ـی تشرینی دوەمی ساڵی ٢٠٢٢)ـدا، بەرزان عوسمان، وتەبێژی پۆلیسی پارێزگای هەڵەبجە، وتی: لەمساڵ دا هیچ ژنێک لە پارێزگای هەڵەبجە نەکوژراوە.

بەو پێیەش سنوری پارێزگای هەڵەبجە لەماوەی دو ساڵی رابردو و دو مانگی ئەم ساڵ، هیچ روداوێکی کوشتنی ژنانی تێدا تۆمارنەکراوە.

بەڕێوەبەری بەڕێوەبەرایەتی بەرەنگاربونەوەی توندوتیژی هەڵەبجە، هەروەها راشیگەیاند: لەماوەی ساڵی رابردودا (٦٥) سکاڵای توندوتیژیی خێزانی لە سنورەکە تۆمارکراوە، کە زۆرینەی سکاڵاکانیش لەسەر لێدان بون.



Newjin.net - 2024
ژمارەی سەردان 1,357,806     ژمارەی میوان 12

دروستکراوە لەلایەن کۆمپانیای (کۆدتێك)ەوە