کچێکی کورد پاڵێوراوە بۆ بردنەوەی خەڵاتی پریتزكەر

2023/07/16    670 جار بینراوە

 

* نەوژین

کچێکی کوردی دانیشتوی شری سلێمانی پاڵێوراوە بۆ بردنەوەی خەڵاتی پریتزكەر بۆ داهێنانی ژینگەیی.

هانا رەزا، کچە چالاکی بواری ئاژەڵان و هاوکات دامەزرێنەر و سەرۆکی رێکخراوی پڵنگانی بێ سنورە، لە پەڕەی تایبەتی خۆی لە فەیسبوک، نوسیویەتی: هاوشانی ١٧ کەسی دیکە پاڵێوراوم بۆ بردنەوەی خەڵاتی پریتزكەر بۆ داهێنانی ژینگەیی.

خەڵاتەکە تایبەت لەلایەن زانكۆی كالیفۆڕنیاوە دەدرێت بەو کەسەی کە دۆخی ژینگەیی لە جیهان دا بەرەوپێش دەبات و کاردەکات بۆ چارەسەرکردنی ئاستەنگەکانی ژینگە و یاسای ئاژەڵە کێوییەکان.
 
رێکخراوەکەی هانا تایبەتە بە پاراستنی ئاژەڵە کێوییەکانی عێراق بەتایبەت ئەوانەی کە لە مەترسیدان، هاوکات گرنگی بە پاراستنی ئاژەڵە شیردەرەکان دەدات، بەتایبەتی پڵنگی فارسی.

هانا، دەرچوی زانکۆی نیوکاسڵە و بڕوانامەی ماستەری لە ئیکۆلۆژی و پاراستنی ئاژەڵە کێوییەکان بەدەستهێناوە.

بڕیارە ( ٢٦ـی تشرینی یەکەمی ئەمساڵ) لە مەراسیمێک دا خەڵاتەکە دابەشبکرێت. 

لەبارەیەوە هانا دەڵێت: براوەی یەكەم بم یان هەر بە پاڵێوراوی بمێنمەوە، گەورەیی خۆی هەیە و دەستكەوتێكی مەزنە بۆ من و كوردستان و عێراقیش، ئەوەی بۆ من گرنگە ئەوەیە، ئەم دانپێدانان و دەسكەوتە جیهانیانە، هاندەرمان بن بۆ بەردەوام بون.



Newjin.net - 2024
ژمارەی سەردان 1,551,418     ژمارەی میوان 1844

دروستکراوە لەلایەن کۆمپانیای (کۆدتێك)ەوە