مینا مەردۆخ: پێیان وتم ناتوانیت کاری عەقارات بکەی، بەڵام پیشانم دان کە دەتوانم

2022/08/17    838 جار بینراوە
 
* نەوژین، سومەیە ساڵح
 
ماوەی دو ساڵە کۆمپانیایەکی عەقاراتی کردوەتەوە و لە رێگەیەوە هەلی کاری بۆ چەندین کچی دەرچوی زانکۆ رەخساندوە، دەشڵێت: بۆیە کارمەندەکانم هەمو کردوە بە کچ، چونکە کچان بە دیقەتتر و وردترن لە کارکردن.
 
مینا مەردۆخ، لەدایکبوی شاری کەرەجە لە وڵاتی ئێران، ماوەی دو ساڵە هاتوەتە هەولێر و کۆمپانیایەکی عەقاراتی بەناوی (عەقاراتی بانو) کردوەتەوە و تەواوی کارمەندەکانی نێو کۆمپانیاکەشی کە ژمارەیان ١٢ کارمەندە ژنن.
 
لەبارەی عەقاراتەکەیەوە مینا، دەڵێت: تاکە عەقاراتە لە کوردستان لەلایەن ژنەوە بەرێوەدەبرێت، هەمو کارمەندەکانی نێو کۆمپانیاکەشم ژنن، چونکە ژنەکان ورد و بەدیقەت ترن.
 
هەروەک دەشڵێت: عەقاراتەکانی دیکە بەردەوام رەنگی رەش و سپی بەکاردەهێنن، بەڵام ئێمە زۆرترین رەنگ بەکاردەهێنین بۆ دیزاینەکانمان، بەهۆی ئەمەش خەڵک کارەکانی ئێمەیان زیاتر لا پەسەندە ترە.
 

دامەزراندنی کۆمپانیایەکی عەقارات و بەرێوەبردنی لەلایەن ژنێکەوە، بەئاسانی بەسەر میناوە تێنەپەڕیوە، بەڵکو توشی ئاستەنگ و رەخنەی زۆری کردوەتەوە.
 
دەڵێت: سەرەتا کە دەستم بە کاری عەقارات کرد، خەڵک گاڵتەیان پێدەکردم و دەیانوت ناتوانیت، بەڵام من بە قسەکانی ئەوان بەهێزتر بوم و زیاتر پەرەم بە کارەکانمدا و پیشانمدان کە دەتوام.
 
ئاستەنگەکانی پێش مینا تەنها بە قسە نەوەستاون، بەڵکو وەکخۆی دەڵێت: "بوختانیان پێکردم و وتیان تۆ بەرپرست لە پشتە بۆیە بویت بە خاوەنی کۆمپانیا، لەکاتێکدا من هاوسەرگیریم کردوە و خاوەنی کورێکی ١٤ ساڵانم، لەگەڵ ئەوەدا من لەگەڵ هاوسەرەکەم کاردەکەم و ئەو یارمەتیدەرمە".
 

 

عەقاراتی بانو، دو ساڵە بەشداری پێشەنگاکانی تایبەت بە عەقارات دەکات و بەنیازی کردنەوەی لقی نوێیە لە شاری سلێمانی، هەروەک وەکو یەکەم کۆمپانیای عەقارات بەشی راهێنانی بازرگانی و کارگێری تایبەت بە مناڵان کردوەتەوە.

 
مینا، بە گرنگی دەبینێت کچان کار بکەن و خاوەن داهاتی خۆیان بن، نەوەک بەتەنها چاوەرێی دامەزراندنیان لەلایەن حکومەتەوە بکەن.
 
دەڵێت: پەیامی من بۆ کچان ئەوەیە، پێویست ناکات بەهێزبن بۆئەوەی دەستپیبکەن، بەڵکو دەستپێبکەن بۆ بەهێزبون، ببن بە خاوەن کاری خۆتان تاکو داهاتی خۆتان هەبێت و چاوەرێی دەستی کەس نەبن.
 
 


Newjin.net - 2024
ژمارەی سەردان 1,305,208     ژمارەی میوان 101

دروستکراوە لەلایەن کۆمپانیای (کۆدتێك)ەوە