* نه‌وژین
پۆلیسی سلێمانى رایده‌گه‌یه‌نێت پیاوێك نه‌وتى به ژنه‌كه‌ى دا كردوه و سوتاندویه‌تى، پاش روداوه‌كه‌ش ویستویه‌تى هه‌ڵبێت، به‌ڵام ده‌ستگیر كراوه.
به‌ڕێوبه‌رایه‌تى پۆلیسی سلێمانى له راگه‌یه‌نراوێكدا ده‌ڵێت: شه‌وی رابردو ژنێك له گه‌ڕه‌كى كوردسات له سلێمانى، پاش ئه‌وه‌ى سوتاوه، بۆ نه‌خۆشخانه گوازراوه‌ته‌وه و له‌وێ ئاشكراى كردوه كه هاوسه‌ره‌كه‌ى نه‌وتى پێدا كردوه و سوتاندویه‌تى و دواتر هه‌ڵهاتوه.
رونیشیده‌كاته‌وه: دواى ئاگاداركردنه‌وه‌ى سه‌رجه‌م به‌ش و بنكه‌كانیان، توانیویانه تۆمه‌تباره‌كه ده‌ستگیر بكه‌ن كه له‌دایكبوى 1997ـه و ویستویه‌تى به‌ره‌و سنوره‌كان بڕوات به‌مه‌به‌ستى خۆحه‌شاردان و هه‌ڵهاتن.
پۆلیسی سلێمانى ئه‌وه‌شى رونكردوه‌ته‌وه: ژنه‌كه 75%ـى جه‌سته‌ى سوتاوه و له نه‌خۆشخانه له ژێر چاره‌سه‌ر دایه، تۆمه‌تباره‌كه‌ش به به بڕیاری دادوه‌ر و به‌پێی ماددەکانی 406 و 31 لەیاسای سزادانی عێراقی راگیراوه.
ئه‌و ماده یاساییه‌ى تۆمه‌تباره‌كه‌ى پێڕاگیراوه، تایبه‌ته به كوشتنى به ئه‌نقه‌ست و به‌كارهێنانى ماده‌ى سوتێنه‌ر له كرده‌وه‌كه‌دا، سزاكه‌یشی له‌نێوان زیندانى هه‌میشه‌یی و له‌سێداره‌دانه.