* نەوژین، دێژین سدقی
دو هاوبوک پێکەوە دو کارگەی دروستکردنی راشی “تەحین”ـیان لە قەزای ئامێدی کردوەتەوە و دەڵێن: روبەڕوی ئاستەنگی بوینەتەوە، بەڵام بەردەوام دەبین لە پێشکەشکردنی بەرهەمی پاک و باش.
بێریڤان و پەریخان، وەکو یەکەم ژن لە سەر ئاستی عێراق دو کارگەی دروستکردنی راشی “تەحین”ـیان لە قەزای ئامێدی کردوەتەوە، لەبارەی رێچکەشکێنیەکەیانەوە، بێریڤان بۆ نەوژین وتی: هەندێکجار بارودۆخی قورس دێتە ژیانمان وا لە مرۆڤ دەکات بیر لە گۆڕینی ئەو دۆخە بکاتەوە کە تێیدایە، چیرۆکی ئێمەش بەوشێوەیە بو و بۆ خۆڕزگارکردن لەو قورساییەی ژیان لەگەڵ هاوبوکەکەم بڕیارماندا لەو بوارەی ئەزمون و دەستڕەنگینیمان هەیە کارگەیەک دابمەزرێنین، ئەوە بو سەرەتا کارگەی یەکەم و پاشان لەسەر داوکاری کارگەی دوەممان کردەوە.
بێریڤان تەها و پەریخان عەبدوڵڵا کە هاوتەمەنی یەکترن و تەمەنیان ٣١ ساڵە، یەکەم دو ژنن لە سەر ئاستی عێراق بون بە خاوەن کارگەی لەمشێوەیە، کارگەی یەکەمیان بەناوی کارگەی ‘تەحینی ریبارێ ئامێدیێ’ ـیە و کارگەی دوەمیش بەناوی ‘ئاشی تەحینی فۆلکلور’ ـە
ئەوان وەکخۆیان باسیان لێوەکرد: چوار ساڵ بەر لە ئێستا کارگەی یەکەمیان کردوەتەوە، رۆژانە لەنێوان ٦٠٠ کیلۆ بۆ تەنێک تەحین بەرهەمدەهێنن، هەرچی کارگەی دوەمیشە رۆژانە لەنێوان ٢٨٠ بۆ ٣٠٠ کیلۆ تەحین بەرهەمی هەیە.
قەزای ئامێدی کە ناوچەی نیشتەجێبونی بێریڤان و پەریخانە، یەکێک لە قەزاکانی سەر بە پارێزگای دهۆکە و لە حەوت ناحیە پێکدێت، ساڵانە بە نزیکەیی ٨٠٠ دۆنم زەوی بە کونجی دەچێندرێت واتا نزیکەی ٢٤٠ تۆن تەحین بەرهەم دەهێندرێت.
وەک بێریڤان بە نەوژینی وت: بۆ کارگەکانمان بەرهەمی کشتوکاڵی ناوخۆ ساغ دەکەینەوە، کونجی لە جوتیارەکانی دێرەلوک و کوانێ دەکڕین و بە هاکواری خێزانەکانمان دەیانبەینە ئاش و دەست بە هاڕینیان دەکەین تاوەکو دەبنە تەحین.
ئەوەی وایکردوە بێریڤان و پەریخان لەکارەکەیان سەرکەوتوبن، پاڵپشتیکردنیانە لەلایەن هاوسەرەکانیانەوە، ئەمەش بە وتەی خۆیان، کارەکەیان بێ ئاستەنگی تێنەپەڕاندوە، وەکخۆیان ئاماژەیان پێکرد: ئەوەی هەستمان بریندار دەکات کۆمێنتی خەڵکیە لە سۆشیاڵمیدیا، تەنها چونکە ژنین و کاردەکەین، روبەڕوی کۆمەڵێک قسە بوینەتەوە. بەڵام بێریڤان وتی: قسەکان کار لە بەرەوپێشچونی زیاترمان ناکات و بەردەوام دەبین لە دروستکردنی بەرهەمی باش و پاک.