* نەوژین

لەنێو سەرجەم بنکەکانی پۆلیسی پارێزگای هەڵەبجە تەنها یەک ژنە لێکۆڵەر بونی هەیە، پۆلیسی ناوچەکە کەمی ژنان لەبوارەکە و پلەبەندی بەهۆکار دەبینێت و راوێژکارێکی خێزانی نیشتەجێی شارەکەش باس لە چەند لایەنێکی نەرێنی ئەم پرسە دەکات کە بەوهۆیەوە روبەڕوی ژنانی قوربانی توندوتیژی دەبێتەوە.  

لە سنوری پارێزگای هەڵەبجە، حەوت بنکەی پۆلیس کە هەریەک لە بنکەکانی (هەڵەبجە، خورماڵ، سیروان، شەهید سەرکار، بەمۆ، تەوێڵە و بیارە) دەگرێتەوە و سەرجەمیان سەر بە بەڕێوەبەرایەتی پۆلیسی پارێزگای هەڵەبجەن بونیان هەیە، ئەوەی جێگەی سەرنجە لەکۆی هەمویان تەنها یەک ژنە لێکۆڵەرێک بونی هەیە.

لەوبارەیەوە، ئاکام قوتبەدین، وتەبێژی پۆلیسی هەڵەبجە بە نەوژینی وت: ئێمە لەسەرجەم بنکەکان بە نزیکەیی ٦٠٠ کارمەندمان هەیە، بەڵام لەو ژمارەیە تەنها ٧ـیان ژنن، تەنها یەکێکیش لەوان بەپێی پلەبەندی و بڕانامەکەی توانیومانە بیکەین بە لێکۆڵەر کە ئەویش لە بنکەی خورماڵ ـە.

راوێژکارێکی خێزانی ئەمە بە کێشە لەبەردەم ژنانی قوربانی توندوتیژی دەبینێت و باسلەوەشدەکات، ژنێکی لێکۆڵەر وردتر لەکێشەی ژنان تێدەگات وەک لە پیاوێکی لێکۆڵەر.

ساکار عارف، راوێژکاری خێزانی بە نەوژینی وت: هەبونی ژنی لێکۆڵەر لەنێو بنکەکانی پۆلیس بۆ ژنان و مناڵانی قوربانی توندوتیژی زۆر گرنگە، چونکە ژنان لەڕۆڵی لێکۆڵینەوە و پۆلیس دا زیاتر لە پیاوان دەتوانن پەیوەندیان لەگەڵ دروستبکەن، هەروەها لە زۆرێک لە کەیسەکان دا، قوربانیەکان ئاسودەترن کە لەگەڵ لێکۆڵەرەوەیەکی ژن قسە بکەن، بەتایبەتی لە کەیسە پەیوەندیدارەکان بە توندوتیژیی کۆمەڵایەتی یان تاوانکاری. 

زیاتر رونیکردەوە: لێکۆڵەرەوە ژنەکان دەتوانن وردبینی زیاتریان هەبێت لە کەیسەکانی توندوتیژی دژ بە ژنان، وەک توندوتیژیی ماڵەوە، رفاندن، یان هەر جۆرە توندوتیژییەکی تر کە زیاتر روبەڕوی ژنان دەبێتەوە.

وتەبێژی پۆلیسی هەڵەبجە، پشتڕاستی ئەم قسانەی کردەوە، وتیشی: پێشتر لەوانەیە زۆر کاریگەری نەبوایە، بەڵام لە ئێستایا چونکە پەڕاوی لێکۆڵینەوەی کەیسەکانی ژنانیش دێنە لامان، زۆر گرنگە بونی ژنان وەک لێکۆڵەر لە بنکەکانی پۆلیس. لەبارەی ئەوەیشی ئایا هەوڵیانداوە بە دامەزراندنی ژنان وەک لێکۆڵەر، وتی: ماوەیەکی زۆرە دامەزراندن راگیراوە و ناتوانین داوای هیچ راژەیەک بکەین.

نەبونی ژنە لێکۆڵەر لەنێو بنکەکانی پۆلیس چەند لایەنێکی نەرێنی هەیە، ساکار کە هاوکات توێژەری کۆمەڵایەتیشە، باسی لە کاریگەریە نەرێنیەکان کرد و وتی:  هەندێک کات ئەو ژنانەی کە قوربانی توندوتیژی یان تاوان دەبن، ئامادە نیین بۆ راپۆرتکردنی کەیسیان بە لێکۆڵەرەوەی نێر، هەروەها ژنان لێرە وا راهاتون متمانە بە ژنێک زیاتر بکەن وەک لە پیاوێک بەتایبەتی لەکاتی مامەڵەکردن لەگەڵ کێشەکانی وەک توندوتیژیی خێزانی یان توندوتیژیی سێکسی.

زیاتر وتی: لەلایەکی دیکە نەبونی لێکۆڵەری ژن وادەکات پارێزیی لە کەیسەکانی تایبەت بە ژنان کەمتر بێت، بەهۆی ئەوەی کاتێک لێرە ژنێک باسی کەیسەکەی بۆ لێکۆڵەری پیاو بکات دەبێت کەسێکی دیکە لە ژورەکە هەبێت یان دەرگاکە کراوەبێت.

لەنێو حکومەتی خۆجێی پارێزگای هەڵەبجە، ژمارەیەکی زۆر ژن پۆستی باڵایان هەیە، وەک پۆستەکانی؛ قایمقام، بەڕێوەبەری گەشتوگوزار، بەڕێوەبەری کتێبخانەی زانکۆکە، بەڕێوەبەری ڤێرتەنەری هەڵەبجە، یەکێتی تۆپی بالەی هەڵەبجە و چەند پۆستێکی دیکە. 

ساکار عارف وایدەبینێت، بونی ژنان لەنێو پۆلیسیش دەبێتە هۆیە باشترکردنی دۆخی بەڕێوەبەرایەتیەکە  وتی: ژنان لە ڕۆڵی لێکۆڵەرەوەدا دەتوانن کلتوری پۆلیس بەرە و باشتربون بگۆڕن، بەتایبەتی لە بواری بەکارهێنانی هێز و شێوازی مامەڵەکردن لەگەڵ کەیسەکان، هەروەها لەلایەکی دیکە ژنەکان دەتوانن دڵنیابن لەوەی کە کەیسەکانی ژنان بە شێوەیەکی یەکسانیانە مامەڵەیان لەگەڵ دەکرێت و مافەکانیان پارێزراوە.