* نەوژین
دواجار پۆستی پارێزگاری هەڵەبجە بە وەکالەت بۆ ژنێکی شارەکە یەکلابوەوە کە ئەویش نوخشە ناسح ـی قایمقامی شارەکەیە و بڕیارە رۆژی (٢٠ـی ئەم مانگە) کە دەکاتە پێنج شەممەی داهاتو دەستبەکارببێت، ئەمەش لەدوای خانەنشین بونی پارێزگاری شارەکە و جێگرەکەی.
هەواڵەکە دەزگای میدیای درەو بڵاویکردوەتەوە و دەڵێت: دوێنێ پێجنشەممە، مەسرور بارزانی، سەرۆكی حكومەتی هەرێمی كوردستان فەرمانی بۆ نوخشە ناسیح دەركردوە ببێتە پارێزگاری هەڵەبجە بەوەكالەت.
نوخشە ناسح، ساڵی ١٩٧٨ لە شاری هەڵەبجە لەدایک بوە و هەر لەوێ گەورە بوە و دەرچوی بەشی یاسا ـیە، هاوسەرگیری کردوە و دایکی دو کچە.
سەرەتای وەرگرتنی پۆستی حکومی لەلایەن نوخشەوە بۆ ساڵی ٢٠٠٨ دەگەڕێتەوە، ئەوکات وەک بەڕێوەبەری ناحیەی بیارە دەستبەکار بو و بۆماوەی حەوت ساڵ لە پۆستەکەی بەردەوام بو. دواتریش لە ٢٧ـی ئاداری ٢٠١٦ پۆستی قایماقمی ناوەندی هەڵەبجەی پێسپێردرا.
ئەو لەدوای عادیلە خان یەکەم ژنە لە شارەکە پۆستی باڵا وەردەگرێت، هەروەک بە وەرگرتنی پۆستی پارێزگاری هەڵەبجە، دەبێتە یەکەم ژن لە هەرێمی کوردستان پۆستی پارێزگاری شارێکی پێ بسپێردرێت.