* نەوژین
ئامارەکانی توندوتیژی دژ بە ژنان لە هەڵەبجە بۆ ساڵی ٢٠٢٤ بڵاوکرانەوە، بەپێی ئامارەکە لەو ساڵەدا ژنێک ناچار بە خۆسوتاندن کراوە، هەروەک بۆ سێیەم ساڵ لەسەریەک هیچ کوشتنێکی ژنان تۆمارنەکراوە و رێژەی توندوتیژی دژ بە ژنانیش کەمیکردوە.
ئەمڕۆ دوشەممە لەگەڵ رێوڕەسمی پەردەلادان لەسەر تابلۆی (ئارامی و بەختەوەری خێزان، زامنی ئاسایشی کۆمەڵگەیە) لەلایەن بەڕێوەبەرایەتی بەرەنگاربونەوەی توندوتیژی دژ بە خێزان و ژنان-هەڵەبجە، ئامارەکانی توندوتیژیش راگەیەندران.
بەپێی ئامارەکان بەدرێژایی ساڵی ٢٠٢٤؛ ٥٣ توندوتیژی دژ بە ژنان ئەنجامدراوە، حاڵەتەکان بەمشێوەیە بون: لێدان: ١٠ حاڵەت، سوکایەتیپێکردن و جوێندان: ١٠ حاڵەت، شەڕکردن: ٢ حاڵەت، ئیھانەکردن: ٤ حاڵەت، ھەڕەشەکردن: ١١ حاڵەت، دەرکردن لە ماڵ: ٤ حاڵەت، ھۆكاری خۆسوتاندن: ١ حاڵەت، دەستگرتن بەسەر بەڵگەنامە و کەلوپەلی تایبەتی: ١ حاڵەت، رێگری لە سەردانکردن: ١ حاڵەت، مناقەشە و دەنگەدەنگی خێزانی: ٣ حاڵەت، ناپاکی ھاوسەری: ١ حاڵەت و دەرمان خواردن: ١ حاڵەت.
بەپێی ئامارەکان هیچ ژنێک نەکوژراوە، بەوەش بۆ سێیەم ساڵە لەسەر یەک لە ناوچەکە هیچ ژنێک ناکوژرێت.
هەر لەمیانی رێوڕەسمەکە، موقەدەمی مافپەروەر بورھان ئەحمەد، بەڕێوەبەری بەڕێوەبەرایەتی بەرەنگاربونەوەی توندوتیژی دژ بە خێزان و ژنان-هەڵەبجە، رایگەیاند: ئامارەکان بەراورد بە ساڵانی رابردو %٢٢ کەمی کردوە، ئەمەش رەنگدانەوەی کلتوری جوانی ناوچەکە و دەرخەری ئەوەیە ژنان لە ناوچەکەدا رێزلێگیراون، هەروەک رێکخراو و دامودەزگاکانیش رۆڵێکی ئەرێنی دەگێڕن.