* نەوژین
لە ساڵی ٢٠٢٢ـەوە هیچ ئامارێکی فەرمی کوشتن و خۆکوشتنی ژنان لە هەرێمی کوردستان رانەگەیەندراوە، ئەوەش لەکاتێک دا پێشتر لە کۆتایی هەر ساڵێکدا رادەگەیەندرا.
پێشتر کەیسەکانی توندوتیژی دژ بە ژنان دەنێردرانە بەرەنگاربونەوەی توندوتیژی خێزانی، کە سەر بە وەزارەتی ناوخۆیە و لەسەرجەم شارەکان بەڕێوەبەرایەتی و لە زۆرینەی ناحیەکانیش نوسینگەی هەیە، بەڵام لە ساڵی (٢٠٢٢)ـەوە و بە وتەی فێنک شەفیق، بەڕێوەبەری بەڕێوەبەرایەتی گشتی بەرەنگاربونەوەی توندوتیژی دژی ژنان و خێزان، کەیسەکانی کوشتن، خۆکوشتن، سوتان و خۆسوتاندنی ژنان لای ئێمە نەماوە و لە بەڕێوەبەرایەتی پۆلیس لێکۆڵینەوەیان لەبارەوە دەکرێت.
ئەوکات فێنک شەفیق بەبێ هیچ وردەکاریەک تەنها ئەوەندەی راگەیاند؛ لەو ساڵەدا ٤٤ ژن کوژراون، ئەمە بو بە کۆتا ئامار و چیتر هیچ ئامارێکی فەرمی لەوبارەیەوە بڵاونەکرایەوە.
ساڵانە بەڕێوەبەرایەتی پۆلیسی هەرێم، ئامارەکانی سەر بە بەڕێوەبەرایەتیەکەی رادەگەیەنێت، وەک ئاماری کوشتنەکان، دەستگیرکراوەکان، سەرپێچیکارەکان، خۆکوشتن و هەمو بابەتێکی دیکە، بەڵام بەبێ ئاماژەکردن بە رەگەز.
چالاکوانان و داکۆکیکارانی مافەکانی ژنان، ئەمە بە رێگر و بەربەستە لەبەردەم کارەکانیان دەبینن؛ بەهار مونزیر، چالاکی ژنان، بە نەوژینی وت: وەکو رێکخراوەکان ماوەی چەند ساڵێکە، هیچ ئامارێکی ورد و فەرمی کوشتنی ژنانمان لانییە، کە ئەمە رێگری و ئاڵەنگارییە، چونکە بۆ ئێمە گرنگە لەسەر ژمارە کاربکەین و راپۆرتمان هەبێت.
ساڵانە رێکخراوەکان و بەتایبەت رێکخراوی هاریکاری یاسایی ژنان، ئاماری کوشتنی ژنان بڵاودەکاتەوە، بەڵام ئامارەکە فەرمی نییە و وەکخۆیان دەڵێن، لەڕێگەی دادگاکان و راگەیاندنەکانەوە کۆیاندەکەنەوە.