* نەوژین
ژمارەیەك رێكخراوی كۆمەڵگەی مەدەنی و داکۆکیکار لە مافەكانی ژنان و دامەزراوەی میدیایی لە راگەیەنراوێك دا بەبۆنەی رۆژی جیهانی ژنان، هۆشداری دەدەن لە جێبەجێکردنی هەمواری یاسای باری کەسی لەعێراق و دەڵێن: مەترسی دروستکردنی نادادپەروەری کۆمەڵایەتی قوڵ و درێژخایەن بۆ ژنان و کچان دروستدەکات.
هاوبەشەكانی پڕۆژەی هاوڵاتیبون كە رێكخراوی وادی ئەڵمانی و ژمارەیەك هاوبەشی ناوخۆیی لە عیراق جێبەجێی دەكەن، بەبۆنەی ٨ـی مارس/ رۆژی جیهانی ژنانەوە، راگەیەندراوێکیان بڵاوکردوەتەوە و تێیدا دەڵێن: پەسەندکردنی هەموارکردنی یاسای باری کەسێتی عیراق نیگەرانیەکی زۆری لێکەوتوەتەوە و پرسیاری جددی دەربارەی مافەکانی ژنان و هاوسەرگیری مناڵان و سەروەری یاسا دروستکردوە.
دەشڵێن: رێکخراوە نێودەوڵەتی و نەتەوەییەکانی کۆمەڵگەی مەدەنی ماندونەناسانە کار بۆ هەڵسەنگاندنی کاریگەری ئەم هەموارکردنانە دەکەن، داڕمانی پاسەوانی یاسایی نەک تەنها هەڕەشە لە مافەکانی تاک دەکات، بەڵکو دەسەڵاتی دادوەریش وەک داکۆکیکار لە دادپەروەری لاواز دەکات، هەروەک ئەم گۆڕانکارییانە مەترسی دروستکردنی نادادپەروەری کۆمەڵایەتی قوڵ و درێژخایەن بۆ ژنان و کچان لە عیراق دا دروستدەکەن.
ئاماژەبەوەشکراوە: جگە لە نیگەرانی یاسایی، زیادبونی هاوسەرگیری مناڵان لەوانەیە ببێتە هۆی توندوتیژی زیاتر لەسەر بنەمای جێندەر، لەوانە؛ کوشتنی بە بیانوی شەرەف و توندوتیژی خێزانی، لە هەمانکاتدا بارودۆخی سیاسی و ئابوری جیهانی دابینکردنی پشتگیری پێویست بۆ کارکردنی کۆمەڵگەی مەدەنی قورستر کردوە و توانای رێکخراوەکانی بۆ وەڵامدانەوەی کاریگەر سنوردار کردوە، بۆیە بەبێ سەرچاوەی پێویست، شەڕی دژی توندوتیژی و نادادپەروەری لەسەر بنەمای جێندەر سەختتر دەبێت.
هاوڵاتیبون پڕۆژەیەكی نوێی پاڵپشتیكراوە لەلایەن رێكخراوی وادی ئەڵمانی بەپاڵپشتی باڵیۆزخانەی هۆڵەندا لە عێراق، كە ئامانج لێی دەستپێشخەریی نوێ و چارەسەرکردنی ئاستەنگە گرنگەکانی كۆمەڵگەن وەک تێکچونی ژینگە، توندوتیژی لەسەر بنەمای جێندەری، هەمو جۆرەکانی توندوتیژی لە قوتابخانەکان، نەبونی دەستڕاگەیشتن بە چاودێری تەندروستی و زانیاری سنوردار لەسەر مافە یاساییەکانی ژنان.