* نەوژین
چالاکێکی بواری ژنان، دەڵێت: بەراورد بە رابردو، دۆخی ژنان لە کوردستان گۆڕانکاریەکی وای بەسەرنەهاتوە کە جێگەی دڵخۆشی بێت، باسلەوەشدەکات: ئەو گۆڕانکاریەش کە دروست بوە، ژنان خۆڕسکانە هەوڵیان بۆداوە و بە دەستیان هێناوە.
خانمە چالاکی ژنان؛ هەیفا مەجید، لەبارەی دۆخی ژنان لە هەرێمی کوردستان بۆ نەوژین دەڵێت: دۆخی ژنان بە گشتی بەشێوەیەکی دڵخۆشکەر نییە، لەدوای چەندین ساڵ هەوڵدان و دروستکردنی یاسا بۆ بەرەنگاربونەوەی، هێشتا دەبینین ئەنجامدانی توندوتیژی بەرامبەریان و کوشتنی ژنان بەردەوامی هەیە و رێژەکەی کەمی نەکردوە. زیاتر وتی: ژینگەی هەرێم بەراورد بە عێراق بۆ ژنان لەبارترە، بەڵام هێشتا بەوشێوەیە نییە و ئەوەی هەیە زیاتر هەوڵدانێکی خۆڕسکانەی ژنان خۆیانە.
لەبارەی بەرەوپێشچونی ژنان لە بوارەکانی کارکردن، سیاسیەت، وەرزش و هونەر، ئەو خانمە چالاکە وتی: دۆخی ژنان لەم روانەوە تا رادەیەک باشتر بوە، بەڵام ئەوەی هەیە وەک دەستپێشخەری بۆ ئەمە هەوڵی خۆڕسکانەی ژنان خۆیانە، هاتونەتە دەرەوە بۆ کارکردن، بەشداری پرسە سیاسیەکان دەکەن، دەبنە وەرزشوان و هونەر پێشکەش دەکەن، ئەمانە تەنها یەکلایەنە ژنان هەوڵیان بۆداوە، گەرنا بەشێکی کۆمەڵگە هێشتا لای ئاسایی نییە لە جێگەیەک دەوام بکات بەڕێوەبەرەکەی ژن بێت.
ئەو خانمە چالاکە پێیشی وایە ژنان بۆ پێشکەوتنی زیاترە بە پلەی یەک پاڵپشتیکردنی یەکتریان پێویستە، وتی: گرنگترین خاڵ بۆ بەرەوپێشچونی ئێمەی ژن پێکەوە بونمانە و بەبێ پاڵپشتی یەکتر بە هیچ ناگەین، کە بەداخەوە ئەمە ئێستا زۆر باو نییە لەنێوانمان، بەڵکو دژایەتیکردنی یەک هێشتا لەنێومان بونی هەیە.