* نەوژین
١٣ ژن لەنێو بەڕێوەبەرایەتی بەرەنگاربونەوەی توندوتیژی گەرمیان بەرپرسیارێتیان هەیە، وتەبێژی بەڕێوەبەرایەتیەکەش دەڵێت: خۆشحاڵ دەبین بە هاتنە پێشەوەی ژنان بۆ کێبڕکێی بەدەستهێنانی بەرپرسیارێتی، دەشڵێت: ئێستا کە ژمارەیان کەمە هۆکارەکەی خشتەی دابەشکردنی کارەکانە کەلەسەر بنەمای پلەبەندیە.
لەنێو بەڕێوەبەرایەتی بەرەنگاربونەوەی توندوتیژی دژ بە ژنان و خێزانی گەرمیان ١٢٣ فەرمانبەر هەن، لەو ژمارەیە ٣٥ـیان ژنن، هاوکات خودی بەڕێوبەرایەتیەکە لە (٧) بەشدا خۆی دەبینێتەوە (یاسا، ئامار و پلاندانان، کارگێریی، ژمێریاریی، جوڵان و تاوان، سەربازی و شارستانی له‌گه‌ڵ ئامێرسازیی).
به‌ڕێوبه‌رایه‌تیه‌كه له قه‌زاكانى كه‌لار و كفری و ناحیه‌ى رزگاریی نوسینگه‌ى هه‌یه، پێشتر له قه‌زاى خانه‌قینیش نوسینگه‌ى هه‌بوه، به‌ڵام به كاریگه‌ریی روداوه‌كانى ١٦ـی ئۆكتۆبه‌رى ٢٠١٧، نوسینگه‌كه داخراوه و كراوه به تیمی گه‌ڕۆك "مۆبایل”.
لەکۆی حەوت بەشی بەڕێوەبەرایەتیەکە تەنها یەکێکیان لەلایەن ژنەوە بەڕێوەدەبرێت، ئەویش بەشی ئامار و پلاندانان ـە، هەروەک لێپرسراوی تیمە گەڕۆکەکەی خانەقینیش ژنێکە.
لەبارەی پێدانی پۆستی باڵا بە ژنان لەنێو بەڕێوەبەرایەتیەکە، ئەیوب حسێن، وتەبێژی بەڕێوەبەرایەتی بەرەنگاربونەوەی توندوتیژی دژ بە ژنان و خێزان- گەرمیان، بە نەوژینی وت: خشتەی دابەشکردنی کارەکان لێرە لەسەر فەرمانی وەزارەتی ناوخۆ و بنەمای پلەبەندی و بڕوانامەیە، لێرە تەنها یەک ژنە فەرمانبەر هەیە کە پلەی “ئەفسەر”ـی هەبێت ئەوەش لەکۆی ١٣ ئەفسەر، هەروەک ژنە ئەفسەرەکە پۆستی لێپرسراوی تیمە گەڕۆکەکەی خانەقینی پێسپێردراوە.
زیاتر وتی: گەرنا وەک پێدانی پۆست هەموکات ئامادەین پێیانی بسپێرین، زۆر خۆشحاڵیش دەبین بە هاتنە پێشوەی ژنان بۆ کێبڕکێی وەرگرتنی پۆستەکانی نێو بەڕێوەبەرایەتیەکە.
هەر بەشێکی نێو بەڕێوەبەرایەتیەکە لایەنی کەم ٣ هۆبەی هەیە، کۆی گشتی زیاد لە ٢٠ هۆبە دەبێت؛ وتەبێژی بەڕێوەبەرایەتیەکە وتی: ١١ ژن لەو فەرمانبەرانەی لێرەن، لێپرسراوی هۆبەن، بەوشێوەیە بەکۆی گشتی ١٣ ژن لەنێو بەڕێوەبەرایەتیەکە بەرپرسیارێتیان هەیە.
بەڕێوەبەرایەتی بەرەنگاربونەوەی توندوتیژی دژ بە ژنان و خێزانی گەرمیان، ساڵی ٢٠٠٨ دامەزراوە، کاری سەرەکی بەرەنگاربونەوە و ئەنجامدانی کاری لێکۆڵینەوەی تایبەت بە توندوتیژییە خێزانییەکانە تاوەکو کەسی پلە چوار.