* نەوژین
شەوی رابردو لەمیانی گرژی نێوان مامۆستایان و هێزە ئەمنیەکان، پێشێلکاری بەرامبەر چەند راگەیاندکارێک کرا؛ دو ژنە پەیامنێر بریندار بون.
ئەنجومەنی مامۆستایانی ناڕازیی دوێنێ شەو رایگەیاند کە لەلایەن هێزە ئەمنییەکانەوە هەڵکوتراوەتە سەر خێوەتەکەیان کە لە عەربەت دایاننابو بۆ رێگری لە هاتوچۆی تانکەرەکانی گواستنەوەی نەوت و بەزۆر بڵاوەیان پێکراوە و ژمارەیەکیشیان لێ دەستگیرکراوە.
لەبەرامبەریشدا دەزگای ئاسایشی هەرێم- سلێمانی لەبارەی روداوەکەوە راگەیەنراوێکی بڵاوکردوەتەوە و ئاماژەی بەوەداوە: شەوی رابردو لە ناحیەی عەربەت گرژی لەنێوان مامۆستایان و شۆفێرەکاندا دروستبو، ئەوەش وایکردوە ئەوان (ئاسایش) دەستوەردان بکەن.
لە گرژییەکەدا لەلایەن هێزەکانی ئاسایشەوە هێرشکراوەتە سەر بەشێکی زۆر لە پەیامنێر و کامێرامانی دەزگاکانی راگەیاندن و هەندێکیشان دەستگیرکراون.
هەریەک لە چاوەڕوان مەحمود، پەیامنێری دەزگای میدیایی شارپرێس و مەهران رەمەزان پەیامنێری دەزگای مۆراڵ، ئەو دو ژنە پەیامنێرە بون کە لەکاتی دروستبونی گرژیەکان روبەڕوی پێشێلکاری بونەوە و بریندارکران.
ئەوەی لەبارەی تەندروستی چاوەڕوان مەحمود ـەوە لای نەوژینە، بەهۆی پەلاماردان بریندار بوە و شەوی رابردو بۆ ماوەی چەند کاتژمێرێک لە نەخۆشخانەی عەربەت ماوەتە و دواتر بردراوەتەوە ماڵەوە. مەهرانیش وەکخۆی لە تۆمارێکی دەنگیدا دەڵێت: "بەزۆر بردمیانە نێو سەیارەی تایبەت بە هێزەکە، مۆبایلیان لێوەرگرتم و سوکایەتیەکی زۆریان پێکردم، دواتریش فڕێیان دامە خوارەوە، بەهۆیەوە بریندار بوم و ئازارم هەیە".
لەدوای روداوەکان، بەیانی ئەمڕۆ سێشەممە (٢٥ـی شوبات) دەزگای ئاسایشی هەرێمی کوردستان، بەیاننامەیەکی لەو بارەیەوە بڵاوکردەوە و تێیدا دەڵێت: دۆخەکە کۆنترۆڵکراوە. ئێستاش هیچ كەسێک دەستگیرنەكراوه و بریندارەکانیش نەخۆشخانەیان جێهێشتوە، بەبێ ئەوەی ئاماژە بۆ هێرشکردنە سەر رۆژنامەنوسان بکات