* نەوژین، دێژین سدقی
هەرکەس بە بەردەم دوکانەکەی ئایەدا بڕوات هەست بەوەدەکات کچێک خاوەندارێتی دەکات، چونکە بەشێوازێکی زۆر کچانە و سەرنج راکێش دەرەوەی رازاندوەتەوە، دەڵێت: یەکەم کچم لە دهۆک دوکانی تایبەت بە ئوتوکردنی جلم کردوەتەوە "ویستم جیاواز بم".
ئایە محەمەد، ٢٣ ساڵ، دانیشتوی شاری دهۆک و دەرچوی بەشی کارگێڕی کارە لە پەیمانگەی تەکنیکی شارەکە، ماوەی ساڵێکە دوکانێکی تایبەت بە شوشتن و ئوتوکردنی جلوبەرگی کردوەتەوە.
چیرۆکی دەستپێکردنی بەمشێوەیە بۆ نەوژین گێڕایەوە: لەدوای تەواوکردنی زانکۆ، ویستم رێچکەشکێنیەک بکەم، بیرمکردەوە کارێک بکەم کە پێشتر هیچ ژنێک نەیکردبێت، رۆژانە سەردانی بازاڕ و شوێنەکانم دەکرد، تاوەکو لەکۆتاییدا بیرۆکی ئوتوکردنی جلم بۆهات.
زیاتر وتی: وتم ئوتوکردن لەماڵەوە کارێکی ژنانە و لەدەرەوە پیاوانەیە، دەبێت من ئەمە بگۆڕم و لەدەرەوەش وەک ژنێک ئەنجامی بدەم.
‘ئوتوخانەی ئایە’ ناوی دوکانەکەی ئایەیە و لە سێ بەشی درومان، شوشتن و ئوتوکردن پێکدێت.
دەڵێت: چونکە زۆرجار ئەو کەسانەی سەردانی ئوتوخانە دەکەن پێویستیان بە دورینیش دەبێت لە کورتکردن و تەسککردنی جلوبەرگ و بابەتی تر، لەبەر ئەوە بڕیارمدا بەشی درومانیش بۆ دوکانەکەم زیاد بکەم.
لەم کارەی دا بە پلەی یەک دایک و باوکی یارمەتیدەری ئایە بون "هاندەری من بۆ ئەم کارە تەنها خێزانەکەمن، بەتایبەت پاڵپشتی دایک و باوکم، خوشکەکەشم لێرە لەگەڵم کاردەکات و هاوکارمە".
سەرباری ئەوەی کارەکە رێچکەشکێنیە، بەڵام وادیارە ئایە بە نیاز نییە هەر لەم قۆناغە بمێنێتەوە، وتی: خەریکی کردنەوەی لقی نوێم هەر لەناو شاری دهۆک، جگە لەوە پڕۆژە و پلانی دیکەشم بۆ گەورەترکردنی کارەکەم هەیە.
ئەو جگە لە خۆی، ئێستا هەلیکاری رەخساندوە و دو ژنی دیکەش لەگەڵیدا کاردەکەن.
لەبارەی ئەوەی چۆن ژنان بتوانن ببنە خاوەن کاری سەربەخۆی خۆیان؛ ئایە وتی: یەکەم شت گرنگینەدانە بە قسە نەرێنیەکانی دەوروبەر، دواتر مەرج نییە سەرەتای هەمو کارێک بە باشی بڕوات، کێشە هەر دروست دەبێت، ئەوەی گرنگە ئەوەیە بەردەوام بیت.