* نەوژین

کۆنگرەی نۆیەمی یەکگرتوی ئیسلامی بەڕێوەدەچێت، لەکۆی ئەندامە هەڵبژێردراوەکانی ئەنجومەنی سەرکردایەتی و ئەنجومەنی باڵای بەدواداچون، ژنان رێژەی ‘یەک لەسەر سێ’ یان بەرکەوتەوە. 

ماوەی دو رۆژە کۆنگرەی نۆیەمی حزبی یەکگرتوی ئیسلامی بەردەوامی هەیە، تێیدا ٨٦٤ ئەندام بەشدارییان کردوە و تاوەکو ئێستا سێ پرۆسەی هەڵبژاردن ئەنجامدراوە، کە بریتین لە؛ هەڵبژاردن بۆ ئەمینداری گشتی، ئەنجومەنی سەرکردایەتی و ئەنجومەنی باڵای بەدواداچون کرد.

هۆشیار عەبدوڵڵا، وتەبێژی کۆنگرەی نۆیەمی یەکگرتو لەمیانی کۆنگرەیەکی رۆژنامەنوسیدا، ئەنجامەکانی راگەیاند و وتی: بۆ هەڵبژاردنی ئەنجومەنی باڵای بەدواداچون و چاودێری، نۆ کەس هەڵبژێردراون کە سێ ـیان ژنن، واتا بەڕێژەی ‘یەک لەسەر سێ’.

هەروەها ٣٠ کەس بە ئەندامی سەرکردایەتی هەڵبژێردراون، کە دابەشبون بەسەر چوار بازنەی سلێمانی-هەڵەبجە، دهۆک-نەینەوا، هەولێر و کەرکوک. هەروەک ٩ ـیان ژن بون واتا بەڕێژەی (نزیکەی یەک لەسەر سێ). 
 
هەر لەمیانی کۆنگرەکەدا، هەڵبژاردن بۆ ئەمینداری گشتی حزبەکە ئەنجامدرا و سەڵاحەدین بەهادین وەک ئەمینداری گشتی حزبەکە هەڵبژێردرایەوە.

یەکگرتو حزبێکی ئیسلامی سیاسیە لە (٦/٢/١٩٩٤) دامەزراوە و تاکو ئێستا نۆ کۆنگرەی بەستوە.