ئاسایشی هەولێر: ئەو گروپەمان دەستگیرکرد کە تۆمەتبارن بە هۆکاری خۆکوشتنی چەندین کچ

2024/06/18    232 جار بینراوە


* نەوژین

ئاسایشی هەولێر، ئاشکرایدەکات، ئەو گروپەیان دەستگیرکردوە کە هەڕەشەی بڵاوکردنەوەی ڤیدیۆ و وێنەی تایبەتیان لە سەدان کچ و کوڕ کردوە، هەروەک تۆمەتبارن بە هۆکاری خۆکوشتنی چەندین کچ. 

بەڕێوەبەرایەتی ئاسایشی هەولێر دەڵێت: سەردەستەی گروپە مەترسیدارەکەی گۆڤەند (CTS)ـمان لە دەرەوەی وڵات هێناوەتەوە بۆ نێو کوردستان و لەگەڵ باندەکەی دەستگیریمان کردون.

دەستگیرکردنەکە بە هاوکاری پۆلیسی ئینتەرپول بوە، گۆڤەندی سەرۆکی گروپەکە و پێنج کەسی دیکەی ئەندامی گروپی (CTS) دەستگیرکراون، کە بەشێکیان لە نێو هەولێر بون و بەشیکی دیکەشیان لە دەرەوەی وڵات دەستگیراون.

"گۆڤەند" ناوی خوازراوی ئەوگەنجەیە کە سەردەستەی گروپەکە بوە، ناوە راستییەکەی (ئ. ف. ت)ـە و ساڵی ١٩٩٣ لە پارێزگای هەولێر لەدایکبوە و لە وڵاتی تورکیا ژیاوە.

گروپەکە تۆمەتبارن بە ئەنجامدانی ١٥٠  تاوانی ئەلیکترۆنی، هەروەک هۆکاری خۆکوشتنی چەندین کچن، کە وەک ئەندامانی گروپەکە لەکاتی ئیفادەدا وتویانە: لەترسی بڵاوبونەوەی وێنە و ڤیدیۆ تایبەتەکانیان، چەندین کچ خۆیان کوشتوە.

گۆڤەند و ئەندامانی گروپەکەی لەماوەی  زیاتر لە پێنج ساڵی رابردو دا لەڕێگەی چەند گروپێکی تێلیگرامەوە نزیکەی  ٥٠٠ ڤیدیۆ و وێنەی نەشیاوی کچان و کوڕانی هەرێمی کوردستانیان بڵاوکردبوەوە، جگە لە هەڕەشەکردن و پارەوەرگرتن لە سەدان کچی دیکە لە ترسی ئابڕوبردن و بڵاوکردنەوەی نهێنییەکانیان.



Newjin.net - 2024
ژمارەی سەردان 1,542,685     ژمارەی میوان 1201

دروستکراوە لەلایەن کۆمپانیای (کۆدتێك)ەوە