هەولێر: کچێک لەباڵەخانەیەک کەوتەخوارەوە و لەسەر روداوەکەش دو کەس دەستگیرکران

2023/11/18    402 جار بینراوە

 

* نەوژین

لە هەولێر کچێک لە باڵەخانەیەکی پڕۆژەیەکی نیشتەجێبون کەوتەخوارەوە و دەنگۆی گیان لەدەستدانی بڵاوبوەتەوە، بەڵام ئاسایش دەڵێت لەژیاندایە،  لەسەر روداوەکەش دو کەس دەستگیرکران کە دەوترێت دەرکەوتوی سۆشیاڵمیدیان.

کاتژمێر (٧:٣٠ خولەکی)ـی بەیانی رۆژی هەینی (١٧ـی تشرینی دوەم)،  کچێک لە شوقەکانی ئیسکان تاوەر لە هەولێر کەوتەخوارەوە.

لەبارەی روداوەکە سەرچاوەیەک بە نەوژینی راگەیاند: وردەکاری روداوەکە نازانرێت بەوەی روداوەکە تاوانکاریی بوە یان خۆکوژی.

دوای روداوەکەش راگەیەنرا کە کچەکە گیانی لەدەستداوە، بەڵام ئاسایشی هەولێر لە راگەیەنراوێکدا دەڵێت: لە ژیاندایە.

لە راگەیەنراوەکەی ئاسایش دا هاتوە: ئەو ژنەی دوێنێ بەیانی لە شوقەکانی ئیسکان لە شاری هەولێر کەوتوەتە خوارەوە باری تەندروستی ناجێگیرە، بەڵام هێشتا دەژی.

دەشڵێت: لەسەر روداوەکە دو تۆمەتبار دەستگیرکراون و لێکۆڵینەوە لەگەڵیان بەردەوامە، هەروەک زانیاری زیاتر بڵاودەکەینەوە. 

دەوترێت دو دەستگیرکراوەکە، دو کەسی دەرکەوتوی سۆشیاڵمیدیان، بەڵام لایەنە ئەمنییەکان هیچی فەرمییان لەمبارەیەوە رانەگەیاندوە. 

نەوژین زانیویەتیشی کچەکە بە رەگەز ئێرانیە، بەڵام هێشتا ناو و ناسنامەی ئاشکرا نەبوە.



Newjin.net - 2024
ژمارەی سەردان 1,422,038     ژمارەی میوان 537

دروستکراوە لەلایەن کۆمپانیای (کۆدتێك)ەوە