ژنە رۆژنامەنوسێکی کورد دەبێتە براوەی خەڵاتی CPJ

2022/07/15    160 جار بینراوە
 
* نەوژین
 
لیژنەی بەرگریكردن لە رۆژنامەنوسان (CPJ) ناوی ئەو رۆژنامەنوسانە ئاشکرا دەکات کە بون بە براوەی خەڵاتەکانی لیژنەکە بۆ ئەمساڵ، یەکێکیان ژنە رۆژنامەنوسێکی کوردە.  
 
دوێنێ (١٤ـی تەموز) لە بڵاوکراوەیەکدا لیژنەی بەرگریكردن لە رۆژنامەنوسان (CPJ) رایگەیاند: وەک ڕێزلێنان لە پابەندبونیان بە ڕاپۆرتکردنی سەربەخۆ بەرامبەر تەحەدای بێئەندازەی وەک: سەرکوتکردنی حکومەت، دەستدرێژی و زیندانیکردن، چوار رۆژنامەنوس وەک وەرگری خەڵاتی ئازادی ڕۆژنامەگەری نێودەوڵەتی ساڵی ٢٠٢٢ـی CPJ دەستنیشانکراون.
 
ئاشکراشیکردوە: سێ لەو رۆژنامەنوسانە ژنن و بریتین لە: نیاز عەبدوڵڵا دانیشتوی (کوردستانی عێراق)، سێڤگیل موسایێڤای ئۆکرانی و فام ترانگی ڤێتنامی.
 
هاوکات لەبارەی وەرگرتنی خەڵاتەکەوە 'نیاز عەبدوڵڵا' لە پەڕەی تایبەتی خۆی لە فەیسبوک نوسیویەتی: ئەم خەڵاتکردنە بەشێكە لە بەرگریكردن لە بەهاكانی ئازادی رۆژنامەنوسی و رێزگرتن لەو رۆژنامەنوسانەی سەرەڕای بەربەستە سەختەكانی بەردەم كاری رۆژنامەوانییان كۆڵیان نەداوە و بەردەوامن.
 
بڕیارە رێوڕەسمی دابەشكردنی خەڵاتەکان لە مانگی ١١ـی ئەمساڵ لە ویلایەتە یەكگرتووەكانی ئەمریکا بەڕێوەبچێت.

 

 



ئەرشیفی نەوژین | دەربارە | پەیوەندی
Newjin.net - 2022
دروستکراوە لەلایەن کۆمپانیای (کۆدتێك)ەوە
ژمارەی سەردان 621,103     ژمارەی میوان 43