* نەوژین، محەمەد مەحمود
ئەو ژنانەی لە هەرێم دەیانەوێت سیاسەت بکەن بە وتەی چالاکوانانی ژنان دەبێت لە قاڵبی پیاوسالاری بمێننەوە ئەگینا بە تۆمەتی جیاواز دوردەخرێنەوە، دەشڵێن لەنێو سیستەمێکدا کاردەکەن هەمان ئەوسیستەمەیە کەئەوانی خستوەتە ماڵەوە.
دوێنی لە قەزای کەلار، سیمینارێکی تایبەت بە باردۆخی ژنان و تێکۆشان دژی رەگەزگەرایی بە رێوەچوە کە تێدا هەریەک هاوژین زیبا، توێژەری دەرونی و ئەندامی ناوەندی ژنۆلۆژی لەگەڵ شاتو محەمەد، وتەبێژی ژنانی گەنجی تێکۆشەر بابەتەکانیان پێشەکەشکرد.
”ژن پەراوێزخراوە لە سیاسەتدا“
لە بارەی رۆڵی ژن لە سیاسەتدا شاتو محەمەد، بۆ نەوژین وتی: تاڕادەیەکی زۆر پەراوێز خراون، تەنها کاتێک رێگەیان لە بەردەمدا دەکرێتەوە بۆ سیاسەت کردن کەنمونەی درێژەپێدەری زیهنیەتی پیاوکلاسیک بن، ئەم سیستەمەش ئەو ژنانە بەو شێوەیە قبوڵ ئەکا کە بەرنامە رێژیان بۆ دائەنێ، ئەوەش هۆکارە لە دورکەوتنەوەی ژنان لە سیاسەتدا و رۆڵنەگێران لەسیاسەتی دیمکراتیدا.
شاتو محەمەد، وتەبێژی ژنانی گەنجی تێکۆشەر، قەزای کەلار، وێنە: نەوژین
هاوکات نەبونی ژنی بە ئیرادە و خاوەن بیری پێشکەوتو دەبەستێتەوە بەهۆکاری بونی سیاسەتێکی نادیموکرات لە هەرێم دەشڵێت: ”ئەو ژنانەش کە توانی پێشەنگایەتیان هەیە بە تۆمەتی جیاواز جیاواز دوردەخرێنەوە“.
”ئەوژنانەی دێنە دەرەوە لەنێو سیستەمێکدا کاردەکەن کەئەوانی خستوەتە ماڵەوە“
هاوکات چالاکوانانی مافەکانی ژنان باسلەوەدەکەن ژنانی سیاسی هەرێم ژمارەیان زیادی کردوە بەڵام کارگیەریان نا.
هاوژین زیبا، وایده‌بینێت كه ئێستا هاتنه پێشه‌وه‌ى ژنان بۆ هەمو بوارەکانی بەڕێوەبردنی کۆمەڵگە باشتره، رێژەیان زۆرە، بەڵام تەنها ژمارە بەسنیە، کەسایەتی و شێوازی دەرکەوتنیان و چونەپێشەوەیان گرنگە.
هاوژین زیبا، توێژەری دەرونی و ئەندامی ناوەندی ژنۆلۆژی، قەزای کەلار، وێنە: نەوژین
بە نەوژینی راگەیاند: ”زۆر بونی ئەو ژنانەی دێنە نێو بوارە جیاوازەکانی بەڕێوەبردنی کۆمەڵگا بەدیوێکیا دڵخۆشییە کە گوزارشتە لە بەکارهێنانی توانی ژن لەلایەن خۆیەوە، بەدیوێکی تریشیا ئەوژنانەی دێنە دەرەوە لەنێو سیستەمێکدا کاردەکەن هەمان ئەوسیستەمەیە کەئەوانی خستوەتە ماڵەوە، هەربۆیە پێویستە عەقڵیەتێک هەبێت بتوانێت ژن بگۆڕێت لەو بەرگەی هەزار ساڵە بۆی دوراوە“.
قەزای کەلار، سیمینارێکی تایبەت بە باردۆخی ژنان و تێکۆشان دژی رەگەزگەرایی، وێنە: نەوژین