* نەوژین

 

دوێنی تەرمی ژنێک لە سلێمانی دۆزرایەوە، کە بە وتەی پۆلیس تا ئێستا ناسنامەکەی دیار نیەو بکوژەکەشی دەستگیرنەکراوە، بەرپرسی بەشی جێندەر لەنوسینگەی جێگری سەرۆک وەزیرانیش دەڵێت: رێگە نادەین بەبێ ناونیشان تەرمی هیچ ژنێک بنێژرێت".

 

دوێنێ دوشەمە (١٣/١٢/٢٠٢١)لە سلێمانی تەرمی ژنێک بە کوژاوی دۆزرایەوە کە ئاسەواری فیشەکی پێوەبوە، بەپێی زانیارییەکان ژنەکە تەمەنی نزیکەی 35 ساڵ دەبێت، سەرکەوت ئەحمەد، وتەبێژی پۆلیسی سلێمانی لە بارەی تاوانەکەوە بۆ نەوژین وتی: "لێکۆڵینەوکان بەردەوامە، بەڵام تا ئێستا هیچ کەسێک یان خێزانێک پەیوەندی پێوەنەکردوین بۆ تەرمەکەی و ئەنجامدەری تاوانەکەش دەستگیرنەکراوە".

 

لە رابردودا ئەو ژنانەی کە بێ ناسنامەبون و تەرمەکانیان دەدۆزرایەوە لە گۆڕی بێناونیشان دەنێژران، ئاشتی عەبدوڵڵا، بەرپرسی بەشی جێندەر لەنوسینگەی جێگری سەرۆک وەزیران، لەو بارەیەوە رایگەیاند: بەبڕیاری قوباد تاڵەبانی، رێگەنادرێت هیچ ژنێک بێ ناو بەخاک بسپێردرێت، لایەنە پەیوەندیدارەکانی راسپارد کەتەرمی ئەو ژنەی رۆژی دوشەمە  لەسلێمانی دۆزراوەتەوە، بەبێ ناونیشان نەنێژرێت و بەدواداچون بکرێت بۆ دۆزینەوەی ناسنامەکەی و لەهەمان کاتدا بکوژانی بدۆزرێنەوە".