* نەوژین - پەرژین کامەران
لە پرۆژەیەکی هاوبەشی بەڕێوبەرایەتی بەرەنگاربونەوەی توندوتیژی و تۆڕی گەشەپێدانی بەردەوام (KIDO) پرسی یەکسانی جێندەر و توندوتیژی دژ بە ژنان دەکەنە بەرنامەی پرۆگرامەکانی خوێند و دەزگاکانی راگەیاند.
سەرکەوت عومەر، بەڕێوبەری بەڕێوبەرایەتی بەرەنگاربونەوەی توندوتیژی دژی ئافرەتان و خێزان لە سلێمانی، بۆ 'نەوژین' وتی: بەرەنگاربونەوەی توندوتیژی ئەرکێکی هەمەلایەنە و گشتگیرە، ئەرکی بەڕێوبەرایەتیەکانی بەرەنگاربونەوەی توندوتیژی نییە بەتەنیا ئەرکی هەریەکە وەزارەتەکانی (رۆشنبیری، ئەوقاف و کاروباری ئاینی، تەندروستی پەروەردە، کاروباری کۆمەڵایەتی، گواستنەوەو گەیاندن)ەو هەریەکە لەم شوێنانە رۆڵی بەردەکەوێت.
ئەو دەشڵێت: پێشنیارمانکردوە بۆ وەزارەتی پەروەردە کە پرسی باڵانسی جێندەر، خوێندنی جێندەر و باسکردن لە رێزگرتن لە ئافرەت لەقۆناغەکانی مناڵییەوە کە دەچێتە دایەنگا و باخچەی ساوایان، دواتریش بۆ ناوەندەکانی خوێندن بخرێتە ناو پرۆگرامەکانیانەوە.
بەڕێوبەرەکەی بەڕێوبەرایەتی بەرەنگاربونەوەی توندوتیژی بۆ جێبەجێکردنی ئەم پرۆژەیە باسیلەوەکرد وێنەیەکی پێشنیارەکانیان ناردوەتە دامودەزگاکان بۆ کارکردن لەسەری.